სომხეთ-აზერბაიჯანის საზღვარზე კვლავ შეტაკებებია

სომხეთის თავდაცვის სამინისტრო ცეცხლის შეწყვეტის რეჟიმის დარღვევისა და აზერბიჯანისა და სომხეთს შეიარაღებულ ძალებს შორის შეტაკებების განახლების თაობაზე იტყობინება.

თავდაცვის უწყების მტკიცებით, ოთხშაბათს დილით აზერბაიჯანმა განაახლა შეტევითი ოპერაციები, კერძოდ ჯერმუკისა და ვერინ შორჟას დასახლებების მიმართულებით, არტილერიის, ნაღმმტყორცნების და მსხვილკალიბრიანი იარაღის გამოყენებით.

ამავდროულად, ერევანის ცნობით, აზერბაიჯანმა ჯერმუკთან საბრძოლო უპილოტო საფრენი აპარატები გამოიყენა.

აზერბაიჯანმა, თავის მხრივ, განაცხადა, რომ სომხეთის შეიარაღებულმა ძალებმა "კიდევ ერთხელ დაარღვიეს ცეცხლის შეწყვეტა 13-14 სექტემბრის ღამეს" და დილით ცეცხლი გაუხსნეს ქელბაჯარისა და ლაჩინის რაიონებში განლაგებულ ქვედანაყოფებს სხვადასხვა კალიბრის ნაღმტყორცნიდან და არტილერიიდან.

"ჩვენმა ქვედანაყოფებმა საპასუხო რეაგირება მოახდინეს", - ნათქვამია აზერბაიჯანის თავდაცვის სამინისტროს განცხადებაში.

შეგახსენებთ, აზერბაიჯანი-სომხეთის საზღვართან საბრძოლო მოქმედებები 12 სექტემბერს, ღამიდან განახლდა. ერევანმა და ბაქომ ერთმანეთი დაადანაშაულეს აგრესიის წამოწყებაში.

ოფიციალური მონაცემებით, პირველ დღეს დაიღუპა 50 აზერბაიჯანელი სამხედრო. სომხეთმა დაადასტურა 49-ის დაღუპვა. 13 სექტემბერს, რუსეთმა განაცხადა, რომ მისი შუამავლობით, დილის 9 საათიდან ამოქმედდა ცეცხლის შეწყვეტის რეჟიმი.