ოთხი დეპუტატი საპარლამენტო უმრავლესობის წევრად რჩება, დასამალი არაფერია - ირაკლი კობახიძე

ოთხი დეპუტატი რჩება საპარლამენტო უმრავლესობის წევრად, დასამალი არაფერია, არაფერი კეთდება ფარულად, – ამის
შესახებ „ქართული ოცნების“ თავმჯდომარე ირაკლი კობახიძემ ბრიფინგზე „ქართული ოცნების“ საპარლამენტო უმრავლესობისა და სამთავრობო გუნდის გასვლით შეხვედრაზე „ხალხის ძალის“ წარმომადგენლების დასწრებასთან დაკავშირებით კომენტირებისას განაცხადა.

„ისინი აღარ არიან პარტიის წევრები და შესაბამისად, ფრაქციის წევრები, მაგრამ რჩებიან საპარლამენტო უმრავლესობის წევრებად. ანუ ყველა ქვეყანაშია გავრცელებული ეს პრაქტიკა. აუცილებელი არ არის, უმრავლესობა შედგებოდეს ერთი პარტიის წარმომადგენლებისგან. მათ ნათქვამი აქვთ, რომ მხარს დაუჭერენ ჩვენს საპარლამენტო ინიციატივებს, რაც ბუნებრივია, ჩვენთვის ძალიან მნიშვნელოვანია.

ჩვენს ფრაქციას 80 ხმა აქვს საქართველოს პარლამენტში, 76 ხმა სჭირდება გადაწყვეტილებების მიღებას და რა თქმა უნდა, ძალიან მნიშვნელოვანია ის, რომ სათანადო ხმების რეზერვი გვქონდეს. მათ მიიღეს ეს გადაწყვეტილება, მართალია, დატოვეს ფრაქცია, პარტია, მაგრამ ისინი მხარს უჭერენ უმრავლესობის პოზიციებს და აქედან გამომდინარე, ჩვენთვის ეს არის მნიშვნელოვანი.

დასამალი არაფერი გვაქვს, არც საზოგადოების წინაშე და არც არავის წინაშე. ყველაფერი ღია და გაცხადებულია. ოთხ პარლამენტართან ჩვენ გვქონდა ერთ საკითხზე უთანხმოება. ეს საკითხი იყო ის, რა დოზით უნდა ყოფილიყო ნათქვამი რაღაცები საზოგადოების წინაშე. ჩვენ ვთვლით, რომ არის რაღაც დელიკატური საკითხები, რაზეც არ არის მიზანშეწონილი საჯაროდ საუბარი და ამ საკითხებზე ჩვენ უნდა ვისაუბროთ დახურულ კარს მიღმა ჩვენს პარტნიორებთან. მათი მხრიდან გამოთქმული იყო მოსაზრება იმასთან დაკავშირებით, რომ რაღაცებთან დაკავშირებით მეტი სიმართლე უნდა ითქვას საზოგადოების წინაშე, რომ ხალხი იყოს მეტად დაცული. ამაზე ახლაც ვერ ვთანხმდებით. პრინციპში ეს არის უთანხმოების ერთადერთი საგანი ჩვენ შორის. რაც შეეხება უმრავლესობას, უმრავლესობაში ისინი რჩებიან. დასამალი აქ არაფერი არ არის. არაფერი კეთდება ფარულად“, – განაცხადა ირაკლი კობახიძემ.