ისრაელმა და "ისლამურმა ჯიჰადმა" დაზავების შესახებ განაცხადეს

ისრაელი და პალესტინის რადიკალური მოძრაობა "ისლამური ჯიჰადი" დათანხმდნენ ეგვიპტის შუამავლობით მოზადებულ საზავო პირობებს. იტყობინება ისრაელის პრემიერ-მინისტრის ოფისი.

ცეცხლის შეწყვეტის შეთანხმება 7 აგვისტოს, ღამის 23:30 საათზე შევიდა ძალაში.

ზავის ორივე მხარემ მადლობა გადაუხადა ეგვიპტეს შუამავლობისთვის.

"თუ ცეცხლის შეწყვეტის რეჟიმი დაირღვევა, ისრაელი იტოვებს უფლებას, უპასუხოს ძალისმიერად. ჩვენ არ მივცემთ უფლებას არც ერთ მხარეს, ხელი შეუშალოს ისრაელის მცხოვრებლების ყოველდღიურ ცხოვრებას“, - აღნიშნულია ისრაელის პრემიერის განცხადებაში.

თავის მხრივ, "ისლამურმა ჯიჰადმა" ზავის დადება დაუდასტურა სააგენტო dpa-ს.

შეთანხმება ასევე მოიცავს ეგვიპტის ვალდებულებას, რომ იმუშავებს ორი პალესტინელი პატიმრის, ბასემ ალ-საადისა და ხალილ ავავდეს გასათავისუფლებლად.

5 აგვისტოს ისრაელის არმიამ დაიწყო ოპერაცია "ისლამური ჯიჰადის" წინააღმდეგ, კოდური სახელწოდებით "გარიჟრაჟი". შედეგად დაიღუპა ამ რადიკალური ჯგუფის მეთაური ტაისირ ალ-ჯაბარი და მისი ხელმძღვანელობის სხვა წევრები.

რადიკალურმა დაჯგუფებამ 600-მდე რაკეტა გაისროლა ისრაელის მიმართულებით, რაკეტების სამიზნე იყო თელ-ავივი და ათობით ქალაქი სამხრეთით, ღაზის სექტორთან.

7 აგვისტოს, გამთენიისას ღაზის სექტორიდან რაკეტები გაუშვეს იერუსალიმის მიმართულებით.

ისრაელის სარაკეტო თავდასხმებს ბოლო სამი დღის განმავლობაში, პალესტინის მონაცემებით, სულ მცირე 31 პალესტინელი შეეწირა. AFP-ის ცნობით, დაღუპულთა შორის ექვსი ბავშვია, ხოლო 275 ადამიანი დაშავდა.

მოელიან, რომ 8 აგვისტოს გაეროს უშიშროების საბჭოს სხდომაზე განიხილავენ კონფლიქტის მიმდინარე გამწვავებას. სხდომა დახურულ კარს მიღმა, არაბთა გაერთიანებული საამიროების, ირლანდიის, საფრანგეთის, ნორვეგიისა და ჩინეთის ინიციატივით იმართება.

ბოლო დღეებში ვითარების გამწვავება ყველაზე მასშტაბური იყო 2021 წლის შემდეგ. 2021 წლის მაისში ესკალაცია პალესტინელ რადიკალებსა და ისრაელის არმიას შორის 11 დღე გაგრძელდა.

ისრაელისა და რადიკალების დაპირისპირების გამწვავების მიზეზი გახდა ისრაელის მიერ "ისლამური ჯიჰადის" ერთ-ერთი ლიდერი ბასამ ალ-საადი დაპატიმრება. მისი დაკავებისას, პალესტინისა და ისრაელის პოლიციებს შორის შეტაკება მოხდა, დაიღუპა არაბი მოზარდი. "ისლამურმა ჯიჰადმა" განაცხადა, რომ თავისი ლიდერის დაკავებას უპასუხოდ არ დატოვებდა.