ხვალ დილისთვის გადავწყვეტთ, პაპუაშვილთან შეხვედრაზე რა ფორმატით მიიღებს მონაწილეობას საპარლამენტო ოპოზიცია - ლევან ბეჟაშვილი

ხვალ დილისთვის საპარლამენტო ოპოზიციას ექნება თავისი ჩამოყალიბებული დღის წესრიგი და ამ საკითხთან დაკავშირებით ცალკე ბრიფინგი გაკეთდება, მივიღებთ საბოლოო გადაწყვეტილებას, პაპუაშვილთან შეხვედრაზე რა ფორმატით მიიღებს მონაწილეობას საპარლამენტო ოპოზიცია, - ამის შესახებ ჟურნალისტებს, „ნაციონალური მოძრაობის“ წევრმა, დეპუტატმა ლევან ბეჟაშვილმა განუცხადა.

მისი თქმით, დრო საკმაოდ ცოტაა და 12-პუნქტიანი გეგმის შესასრულებლად მნიშვნელოვანი ნაბიჯებია გადასადგმელი. ამიტომ კონსულტაციები გაგრძელდება.

"ხვალ დილისთვის საპარლამენტო ოპოზიციას ექნება თავისი ჩამოყალიბებული დღის წესრიგი და ამ საკითხთან დაკავშირებით ცალკე ბრიფინგი გაკეთდება, მივიღებთ საბოლოო გადაწყვეტილებას, პაპუაშვილთან შეხვედრაზე რა ფორმატით მიიღებს მონაწილეობას საპარლამენტო ოპოზიცია“, – განაცხადა ბეჟაშვილმა.

მისი თქმით, პარლამენტის თავმჯდომარესთან შეხვედრის თაობაზე „ნაციონალურ მოძრაობას“ საბოლოო გადაწყვეტილება ჯერ არ მიუღია.

„ნაციონალური მოძრაობისათვის“ მნიშვნელოვანია, რომ საპარლამენტო ოპოზიცია ერთიანი ფორმატით იყოს წარმოდგენილი და აქ, ამ შემთხვევაში, პაპუაშვილს კი არ ვესაუბროთ დეპოლარიზაციაზე, როგორ მოიქცევა ჭკვიანად ოპოზიცია, არამედ ვესაუბროთ არსებით საკითხებზე; კომისიებში დროის გაჭიანურებაზე კი არ ვესაუბროთ, არამედ ვესაუბროთ რიგგარეშე სესიის კონკრეტულ დღის წესრიგზე. არის საკითხები, რომელიც უკვე მომზადებულია, ამას განხილვაც არ სჭირდება. ერთ-ერთი ასეთი არის საკონსტიტუციო ცვლილებები, რომელიც დეპოლარიზაციას შეუწყობს ხელს და მრავალპარტიულობის ელემენტს გააჩენს ქართულ პოლიტიკაში და არ იქნება მარტო ორი პარტია მთავარი.

ასევე მნიშვნელოვანი არის ანტიკორუფციული მიმართულებით შესაბამისი საკანონმდებლო ინიციატივა, რომელიც უკვე წარდგენილი არის და რომლის განხილვა და მიღება უკვე შესაძლებელია. ამიტომ ჩვენ კონკრეტული დღის წესრიგით არასამთავრობო ორგანიზაციებთან გუშინდელი შეხვედრის შემდეგ შეთანხმებული დღის წესრიგით რიგგარეშე სესიის მოთხოვნას დავაყენებთ“, – განაცხადა ბეჟაშვილმა.