ევროკავშირის ქვეყნები გაზს ისრაელიდან და ეგვიპტიდან მიიღებენ

ევროკავშირმა ეგვიპტის დედაქალაქ კაიროში ხელი მოაწერა ისრაელთან და ეგვიპტესთან შეთანხმებას ევროპისთვის გათხევადებული ბუნებრივი აირის მიწოდების თაობაზე.

შეთანხმების თანახმად, ისრაელი საგრძნობლად გაზრდის ბუნებრივი აირის მიწოდებას ეგვიპტეში, სადაც ის გათხევადდება და გაიგზავნება ევროპის ბაზრებზე.

ისრაელში უკვე შესწავლილი გაზის საბადოების მოცულობა 1 ტრილიონ კუბურ მეტრს აჭარბებს.

თავის მხრივ, ევროკავშირი ისრაელსა და ეგვიპტეს დაეხმარება, გაზარდონ ბუნებრივი აირის მოპოვება და თავიანთ ტერიტორიულ წყლებში გაზის ახალი საბადოების სადაზვერვო სამუშაოები აწარმოონ.

ევროკომისიის პრეზიდენტმა ურზულა ფონ დერ ლაიენმა განაცხადა, რომ ევროკავშირში გაზის იმპორტის ახალი შეთანხმებები ხელს შეუწყობს რუსეთის ენერგომატარებლებზე დამოკიდებულების დაძლევას. უკანასკნელი მონაცემებით, რუსეთის გაზი ევროკავშირის მიერ იმპორტირებული მთელი გაზის 40%-ს შეადგენს. უკრაინაში რუსეთის შეჭრის შემდეგ ევროკავშირის მიერ დაწესებული სანქციები მოითხოვს გაზის იმპორტის ახალი წყაროების მოძიებას.

ფონ დერ ლაიენის თქმითვე, მიღწეული შეთანხმება „დიდი ნაბიჯია ევროპის ენერგომომარაგებაში, ასევე ეგვიპტის რეგიონალურ ენერგეტიკის ცენტრად გადაქცევაში“.

ამასთან, აქტიურად განიხილება მიწოდების კიდევ ერთი შესაძლო მარშრუტი: გაზსადენი, რომლის გაყვანაც თურქეთის ტერიტორიაზე იგეგმება.