თუ ვინმეს ინტერესებში შედის საქართველოსა და უკრაინას შორის ურთიერთობების გაფუჭება, ეს არის სწორედ რუსეთი. ამას ემსახურება არახამიას განცხადებები - ქადაგიშვილი

თუ ვინმეს ინტერესებში შედის საქართველოსა და უკრაინას შორის ურთიერთობების დაძაბვა, გაფუჭება, ეს არის სწორედ რუსეთი. ამას ემსახურება არახამიას განცხადებები და ქმედებები, - ამის შესახებ ამის შესახებ პარლამენტის საპროცედურო საკითხთა კომიტეტის თავმჯდომარე ირაკლი ქადაგიშვილმა განაცხადა.

ქადაგიშვილმა შეაფასა საქართველოს საპარლამენტო დელეგაციის უკრაინაში ვიზიტთან დაკავშირებით უკრაინის რადას ფრაქცია „ხალხის მსახურის“ თავმჯდომარე დავით არახამიას განცხადება, სადაც ამბობს, რომ შთაბეჭდილება დარჩა, საქართველოდან სამთავრობო დელეგაცია უკრაინაში ბუჩის ფონზე ფოტოების გადასაღებად ჩავიდა.

მისი თქმით, არახამიას განცხადებებმა თვითლუსტრაციის როლი შეასრულა. მან ფაქტობრივად კიდევ ერთხელ დაადასტურა, რომ ის არის მოკავშირე რგოლი, მაკოორდინირებელი, რომელიც ომის პარტია „ნაციონალურ მოძრაობასა“ და უკრაინის ხელისუფლების ამდაგვარ ნაწილს აერთიანებს, ვინც რეალურად, დაკავებულია, რომ საქართველოსა და უკრაინას შორის ურთიერთობები დაიძაბოს.

"აქედან ნათლად ჩანს, ვინ იყო ავტორი და სპონსორი იმ განცხადებების, რაც თავის დროზე გაკეთდა და კიდევ ერთხელ აჩვენებს, რომ „ნაციონალური მოძრაობის“, ომისა და ღალტის პარტიის ინტერესი არის ერთადერთი რამ – მაქსიმალურად დაზიანდეს საქართველოს იმიჯი, ქვეყნის ინტერესები, რათა ამ დაზიანებით, ერთგვარი გაუკრვევლობით, ამ არეულობით მოახდინონ ხელისუფლების უზურპაცია. ეს თავიდან ბოლომდე არის განწირული.

ყოველთვის ურთიერთობებში ადვილია უთანხმოების, ჭორის, ცუდი ინფორმაციის და ბოროტის ჩამოგდება. ეს ყოველთვის ადვილად კეთდება. ნდობის, მეგობრობის, გვერდით დგომის მიღწევას მეტი შრომა და თანადგომა სჭირდება. საბოლოო ჯამში, დარწმუნებული ვარ, რომ მეგობრობა გაიმარჯვებს, მაგრამ ასეთი ბოროტი განზრახვის მატარებელი სუბიექტები ახერხებენ, შიგადაშიგ მეგობრობის გზაზე ცუდი პრეცედენტების შექმნას“, – განაცხადა ირაკლი ქადაგიშვილმა.

მისი თქმით, კარგი იქნება, თუ თავად უკრაინელები მიხვდებიან, რომ არახამიას მსგავსი განცხადებები ურთიერთობებს აზიანებს.

„ჩვენ არაფერი აღარ უნდა გავაკეთოთ, ჩვენ არაფერი გვაქვს გასაკეთებელი. ალბათ კარგი იქნება, თუკი თავად უკრაინელები მიხვდებიან, რომ ასეთი ტიპის განცხადებები ორ ქვეყანას შორის ურთიერთობებს აზიანებს. საქართველო უკრაინასთან ურთიერთობაში არის მართალი და გულწრფელი“, – აღნიშნა ირაკლი ქადაგიშვილმა.