სასამართლომ "ვრემიას" რედაქტორი მარინა ოვსიანიკოვა 30 000 რუბლით დააჯარიმა

საქართველო, თბილისი - 20:55 | 15.03.2022

ნანახია: 350

მოსკოვის ოსტანკინოს სასამართლომ სამშაბათს "პირველი არხის" რედაქტორი მარინა ოვსიანიკოვა დამნაშავედ ცნო ადმინისტრაციული სამართალდარღვევის ჩადენაში. იუწყება სააგენტო "ინტერფაქსი".

მედიის ცნობით, სასამართლომ ოვსიანიკოვა 30 000 რუბლით (1000 ლარამდე) დააჯარიმა.

"მარინა ოვსიანიკოვა დამნაშავედ იქნა ცნობილი რუსეთის ფედერაციის ადმინისტრაციულ სამართალდარღვევათა კოდექსის დარღვევაში. მას მიესაჯა ადმინისტრაციული ჯარიმა 30 000 რუბლის ოდენობით", - განუცხადა ინტერფაქსს სასამართლოს პრესმდივანმა.

შეგახსენებთ, 14 მარტს, საღამოს, რუსეთის პირველი არხის საინფორმაციო გადაცემა "ვრემიას" ეთერში, რომელსაც ჟურნალისტი ეკატერინე ანდრეევა უძღვებოდა, რედაქტორი მარინა ოვსიანიკოვა შევიდა, რომელსაც ხელში ეჭირა პლაკატი წარწერით: "არა ომს. არ დაუჯეროთ პროპაგანდას. თქვენ აქ გატყუებენ. რუსები ომის წინააღმდეგ".

საინფორმაციო გადაცემის პროპაგანდისტი წამყვანი ამ დროს რუსეთის წინააღმდეგ დაწესებულ სანქციებსა და მისი შემსუბუქების მიზნით კრემლის მიერ გადადგმულ ნაბიჯებზე საუბრობდა.

კადრში გამოჩენიდან მალევე, მარინა ოვსიანიკოვა ადმინისტრაციული წესით დააკავეს.