უკრაინის მხარდამჭერი აქციის გამო, რუსეთმა საქართველოს საპროტესტო ნოტა გამოუგზავნა

რუსეთის საგარეო საქმეთა სამინისტრო "ევროპული საქართველოს" ორგანიზებით ჩატარებულ უკრაინის მხარდამჭერ აქციას ეხმიანება.

როგორც რუსეთის საგარეო უწყების მიერ გავრცელებულ კომენტარში ვკითხულობთ, აღნიშნული აქციის გამო, მოსკოვმა საქართველოს საპროტესტო ნოტა გამოუგზავნა.

"მომხდარი დიდი შეშფოთებით მივიღეთ. 26 იანვარს ქართულმა ოპოზიციამ ანტირუსული პოლიტიკური აქცია გამართა საქართველოში შვეიცარიის კონფედერაციის საელჩოს რუსეთის ფედერაციის ინტერესთა სექციის შენობის მიმდებარე ტერიტორიაზე. აქციის დაწყებამდე ცოტა ხნით ადრე, სექციაში გაითიშა მთავარი და სარეზერვო ელექტროკვების წყაროები.

ინციდენტთან დაკავშირებით ინტერესთა სექციამ საქართველოს საგარეო საქმეთა სამინისტროს გაუგზავნა ნოტა საქართველოს ხელისუფლების მხრიდან 1961 წლის 18 აპრილის დიპლომატიური ურთიერთობის შესახებ ვენის კონვენციის ზედმიწევნით შესრულების აუცილებლობის შესახებ. მსგავსი გზავნილი რუსეთის საგარეო საქმეთა სამინისტროს მიერ გადაეცა მოსკოვში შვეიცარიის კონფედერაციის საელჩოს საქართველოს ინტერესების განყოფილების ხელმძღვანელს.

ამ დროისთვის, სექციაში ელექტრომარაგება სრულად აღდგენილია. ვიმედოვნებთ, რომ საქართველოს ხელისუფლება მიიღებს ყველა შესაძლო ზომას მსგავსი ინციდენტების თავიდან ასაცილებლად", - ნათქვამია რუსეთის საგარეო საქმეთა სამინისტროს ინფორმაციისა და პრესის დეპარტამენტის დირექტორის მოადგილის, ალექსეი ზაიცევის კომენტარში.

26 იანვარს "ევროპულმა საქართველომ" რუსეთის ყოფილ საელჩოსთან უკრაინის მხარდამჭერი აქცია გამართა.