რუსეთი ნებისმიერ მომენტში, შესაძლოა, უკრაინას თავს დაესხას - ჯენ ფსაკი

შეერთებულ შტატებში ფიქრობენ, რომ რუსეთი ნებისმიერ მომენტში, შესაძლოა, უკრაინას თავს დაესხას. ამის შესახებ თეთრი სახლის პრესსპიკერმა ჯენ ფსაკიმ განაცხადა.

“ჩვენ ვიმყოფებით იმ ეტაპზე, როდესაც რუსეთი ნებისმიერ მომენტში, შესაძლოა უკრაინას თავს დაესხას“, - განაცხადა ფსაკიმ ყოველდღიურ ბრიფინგზე.

გასულ კვირას გავრცელდა ინფორმაცია, რომ რუსეთი უკრაინაში შეჭრის გასამართლებლად, აღმოსავლეთ უკრაინაში პროვოკაციულ ოპერაციას გეგმავს.

შეერთებული შტატების სახელმწიფო მდივნის მოადგილემ პოლიტიკურ საკითხებში ვიქტორია ნულანდმა ბრიტანულ გაზეთ Financial Times-თან ინტერვიუში განაცხადა, რომ თუ რუსეთი უკრაინას თავს დაესხმება, მოსკოვს შეერთებული შტატები და მისი ევროპელი მოკავშირეები მასშტაბურ პასუხს გასცემენ, მათ შორის ფინანსური და ეკონომიკური სანქციებით. მის თქმით, უკრაინაში რუსეთის შეჭრის შემთხვევაში, აშშ-ს მზად აქვს მოქმედების 18 სცენარი.

რუსეთმა იანვრის დასაწყისში უკრაინის საზღვართან განლაგებულ პოლიგონებზე წვრთნები დაიწყო. ასევე New York Times-ის ინფორმაციით, ვლადიმირ პუტინმა უკრაინის საზღვართან სამხედრო ვერტმფრენები გადაისროლა.

მანამდე, 2021 წლის გაზაფხულზე რუსეთმა ანექსირებულ ყირიმსა და უკრაინის საზღვართან 100 ათასზე მეტი სამხედრო განალაგა.