ევროკავშირმა რუსეთს ეკონომიკური სანქციები გაუხანგრძლივა

ევროკავშირმა რუსეთს არსებული ეკონომიკური სანქციები 2022 წლის 31 ივლისამდე გაუხანგრძლივა. ამის შესახებ ევროკავშირის მიერ გავრცელებულ განცხადებაშია ნათქვამი.

„დღეს ევროკავშირის საბჭომ მიიღო გადაწყვეტილება ექვსი თვით, 2022 წლის 31 ივლისამდე სანქციების გახანგრძლივების შესახებ, რომლებიც ამ დროისათვის მოქმედებს რუსეთის ეკონომიკის ცალკეული სექტორის მიმართ“, - წერია დოკუმენტში.

ევროკავშირის ლიდერებმა ბრიუსელში დეკემბრის სამიტზე ერთხამდ დაუჭირეს მხარი გადაწყვეტილებას რუსეთის წინააღმდეგ ეკონომიკური სანქციების შესახებ. ასევე ევროპის ქვეყნების ლიდერებმა მაშინ რუსეთს მოუწოდეს შეასრულოს მინსკის შეთანხმების პირობები.

ევროკავშირის სანქციები, რომლებიც შვიდ წელზე მეტია მოქმედებს, მიმართულია რუსეთის საფინანსო, ენერგეტიკისა და თავდაცვის სექტორების წინააღმდეგ. კერძოდ, რუსული ბანკებისა და კომპანიებისათვის ევროკავშირის კაპიტალის პირველად და მეორად ბაზრებზე წვდომა შეზღუდულია. ასევე დაწესებულია აკრძალვა იარაღის იმპორტსა და ექსპორტზე, მეორადი დანიშნულების პროდუქციაზე.

ამის გარდა, ევროკავშირმა რუსულ მხარეს შეუზღუდა წვდომა ნავთობის მოპოვების ტექნოლოგიებსა და სერვისებზე.

თავდაპირველად აღნიშნული სანქციები ევროკავშირმა 2014 წლის 31 ივლისს ერთი წლით დააწესა. 2015 წლის მარტში სანქციების მოქმედების ვადა მიება მინსკის შეთანხმების პირობების სრულ შესრულებას. ამ მომენტიდან შეზღუდვები ყოველ ნახევარ წელიწადში ერთხელ ხანგრძლივდება. გახანგრძლივებამდე ევროკავშრის ქვეყნები მინსკის შეთანხმების პირობების შესრულებას აფასებენ.