ბაიდენისა და პუტინის ვირტუალური შეხვედრა დასრულდა

აშშ-ისა და რუსეთის პრეზიდენტების ჯო ბაიდენისა და ვლადიმირ პუტინის ვირტუალური სამიტი დასრულდა. შეხვედრა ორ საათზე მეტ ხანს გაგრძელდა.

საუბარი მედიისთვის დახურულ რეჟიმში წარიმართა. პუტინი სამიტს სოჭში მდებარე რეზიდენციიდან ესწრებოდა, ბაიდენი - ვაშინგტონში, თეთრ სახლში იმყოფებოდა.

შეხვედრის მთავარი თემა უკრაინის საკითხი იყო. სავარაუდოდ, საუბარი ასევე შეეხო რეგიონალურ სტაბილურობას, მათ შორის ავღანეთში არსებულ ვითარებას.

თეთრი სახლის წარმომადგენელმა ონლაინ შეხვედრის წინ განაცხადა, რომ შეერთებულმა შტატებმა და ევროპელმა მოკავშირეებმა შეიმუშავეს მკაცრი სანქციების პაკეტი რუსეთის წინააღმდეგ უკრაინაში შეჭრის შემთხვევაში.

გამოცემა Bloomberg-ის ცნობით, აშშ და ევროკავშირი უმსხვილესი რუსული ბანკებისა და რუსეთის პირდაპირი ინვესტიციების ფონდის წინააღმდეგ სანქციების დაწესებას განიხილავენ. ერთ-ერთ ვარიანტად ასევე განიხილება რუსული რუბლის დოლარსა და გირვანქა სტერლინგში კონვერტაციის შეზღუდვა.

CNN-ის ინფორმაციით, ასევე საუბარია საერთაშორისო საგადასახადო სისტემა SWIFT-დან რუსეთის გარიცხვაზეც.

სააგენტო Reuters-ის წყარო ამტკიცებს, რომ განიხილება სანქციები რუსეთის პრეზიდენტის ვლადიმირ პუტინის ახლო გარემოცვის წინააღმდეგ.

ბაიდენისა და პუტინის სამიტის დაწყებამდე აშშ-ის სახელმწიფო მდივანი ენტონი ბლინკენი უკრაინის პრეზიდენტ ვოლოდიმირ ზელენსკის ტელეფონით ესაუბრა. გარდა ამისა, სამიტის შემდეგ ბაიდენი პირადად აცნობებს ზელენსკის პუტინთან მოლაპარაკების შედეგებს.

კრემლმა თავის მხრივ განაცხადა, რომ პუტინსა და ბაიდენს შორის მოლაპარაკებები სამუშაო ხასიათს ატარებს."ამ საუბრისგან არ მოველით რაიმე მნიშვნელოვან გარღვევას".

მოსკოვი დასავლეთისგან ნატოს აღმოსავლეთით გაფართოების შეჩერებას ითხოვს. ამავდროულად, უკრაინა ჩრდილოატლანტიკურ ალიანსში გაწევრიანებას ესწრაფვის, რასაც მოსკოვი წითელი ხაზის გადაკვეთის მცდელობად მიიჩნევს.

ფოტო: Reuters