ის, რაც ვნახეთ ბოლო 24 საათში, შეხსენებაა, რამდენად მნიშვნელოვანია ჯანმრთელობაზე ფოკუსირება - ჰარცელი მიხეილ სააკაშვილზე

ის, რაც ვიხილეთ ბოლო 24 საათში, არის კიდევ ერთი შეხსენება, რომ მნიშვნელოვანია, ფოკუსირება მოხდეს ჯანმრთელობის მდგომარეობაზე, რაც არის ევროკავშირისთვის შეშფოთების მიზეზი, – განუცხადა ჟურნალისტებს საქართველოში ევროკავშირის ელჩმა, კარლ ჰარცელმა.

დიპლომატმა მხარდაჭერა გამოუცხადა სახალხო დამცველსაც, რომელსაც ბოლო დღეების განმავლობაში "ქართულო ოცნება" თავმჯდომარე კობახიძის თაოსნობით, თავს ესხმის და ემუქრება.

„უპირველეს ყოვლისა, როგორც იცით, მე დამოკიდებული ვარ დიდწილად მნიშვნელოვან აქტორებზე მიხეილ სააკაშვილის საქმეზე თვალყურის დევნებისთვის. მსურს, ხაზი გავუსვა იმ ფაქტს, რომ ევროკავშირი მტკიცედ უჭერს მხარს სახალხო დამცველის მუშაობას, მათ შორის მიხეილ სააკაშვილის საქმის მონიტორინგთან და მისი უფლებების დაცვასთან დაკავშირებით მის როლს. ეს ასევე ეხება ობიექტური სამედიცინო რჩევის საჭიროებას, მისი მდგომარეობის სათანადოდ შეფასებისთვის და ასევე, რეკომენდაციების შესრულების საჭიროებას. ეს არის აბსოლუტურად გადამწყვეტი. ვფიქრობ, ის, რაც ვიხილეთ ბოლო 24 საათში, არის კიდევ ერთი შეხსენება, რომ მნიშვნელოვანია, ფოკუსირება მოხდეს ჯანმრთელობის მდგომარეობაზე, რაც არის ასევე ევროკავშირისთვის შეშფოთების მიზეზი. როდესაც საქმე ეხება ამჟამინდელ სიტუაციას, მჯერა, დროულია, რომ ჩიხიდან და დებატებიდან მოხდეს შესაბამის ქმედებებზე გადასვლა, რათა შექმნილი სიტუაცია მოგვარდეს ეროვნული და საერთაშორისო უფლებებისა და ვალდებულებების საფუძველზე“, – განაცხადა ჰარცელმა.

შეკითხვაზე, როგორ ფიქრობს, გადაიყვანენ თუ არა მიხეილ სააკაშვილს სამოქალაქო კლინიკაში, ევროკავშირის ელჩი პასუხობს: „მე არ ვარ გადაწყვეტილების მიმღები პირი. მე ვერ ვუპასუხებ ამ შეკითხვას“.