ნატომ უკრაინა და საქართველო ალიანსის მინისტერიალზე მიიწვია

ნატომ უკრაინისა და საქართველოს საგარეო საქმეთა მინისტრები ალიანსის მინისტერიალზე მიიწვია.

საქართველოს საგარეო საქმეთა მინისტრი დავით ზალკალიანი მიესალმა ნატოს ამ გადაწყვეტილებას.

"ძალიან მისასალმებელია, რომ საქართველო უკრაინასთან ერთად ნატო-ს უახლოეს მინისტერიალზე, რომელიც დეკემბრის დასაწყისში გაიმართება, მიწვეულია და ეს არის კიდევ ერთი აღიარება იმ ხელშესახები პროგრესის, რომელიც საქართველოს, როგორც ასპირანტ ქვეყანას, უკრაინასთან ერთად გააჩნია ნატო-ში ინტეგრაციის გზაზე", - თქვა ზალკალიანმა.

მისი თქმით, აღნიშნული ნაბიჯები საქართველოს ნატო-სკენ მიმავალ გზაზე ააახლოებს.

"2018 წელს იყო პირველად, როდესაც სამიტის ფორმატში, ნატო-საქართველო-უკრაინის ფორმატში ვიყავით მიწვეული, ეს იყო პირველი შემთხვევა, ამის შემდეგაც იყო პრაქტიკაში, როდესაც მინისტერიალების ფორმატში საქართველო და უკრაინა ერთობლივად იყო მიწვეული და მივიღეთ ასეთი სახით მონაწილეობა უკვე ორ მინისტერიალში. უახლეს დეკემბრის მინისტერიალზეც ჩვენი მიწვევაც ძალიან პოზიტიური, სერიოზული, გზავნილი არის ჩვენი ნატოელი პარტნიორების მხრიდან და კიდევ ერთხელ მოხდება ჩვენი ინიციატივების მხარდაჭერა, იგივე არსებითი პაკეტი, რომელიც განახლებულია, ჩვენი თანამშრომლობა შავი ზღვის უსაფრთხოების კონტექსტში, მეტი წვრთნები და ასევე, იმ პრაქტიკული ინსტრუმენტების წინ წაწევის თვალსაზრისით, რაც საშუალებას გვაძლევს ახლოს მივიდეთ იმ მიზანთან, რაც არის ნატო-ში გაწევრიანება", - განაცხადა ზალკალიანმა.