გარწმუნებთ, სააკაშვილს არ შეექმნება არცერთი სასიცოცხლო რისკი - ეკატერინე ტიკარაძე

ჩვენ გავითვალისწინებთ ყველა რეკომენდაციას, რომელსაც გასცემენ ექსპერტები, თუმცა მნიშვნელოვანია, რა თქმა უნდა, კლინიკური დასაბუთება, რომ ეს პაციენტს ნამდვილად ესაჭიროება და მე გარწმუნებთ, რომ მას არ შეექმნება არცერთი სასიცოცხლო რისკი, - აცხადებს ქვეყნის ჯანდაცვის მინისტრი საქართველოს მესამე პრეზიდენტთან მიმართებაში.

როგორც ეკატერინე ტიკარაძემ აღნიშნა, არაერთი კითხვა გაჩნდა იმის თაობაზე, თუ რამდენად აკმაყოფილებს პენიტენციური სამსახურის საავადმყოფო ყველა იმ საჭირო მოთხოვნას, რომელიც სჭირდება ნებისმიერ პაციენტს.

"სწორედ აქედან გამომდინარე, გუშინ, რეგულირების სააგენტომ მიიღო დავალება, რის შედეგადაც ის დღეს შევა პენიტენციურ საავადმყოფოში და შეამოწმებს მის მზაობას არამხოლოდ პაციენტ სააკაშვილის, არამედ სხვა პაციენტების მიღების უსაფრთხოების თაობაზე, დადებს დასკვნას, რომელსაც ჩვენ აუცილებლად გავასაჯაროებთ. რაც შეეხება ექსპერტების რეკომენდაციებს, რეკომენდებული იყო „დოპლერის“ გაკეთება პაციენტისთვის, რაც გუშინ შესრულდა და პაციენტს ამ მიმართულებით არ აღენიშნება არანაირი გართულება.

პაციენტი იმყოფება მუდმივი მონიტორინგის ქვეშ. ახლაც ადგილზე, კონსილიუმის გარდა, იქ არსებული სამედიცინო პერსონალის მხრიდან ხდება მისი ჯანმრთელობის მუდმივი მონიტორინგი. აქედან გამომდინარე, ყველა რისკი დაყვანილია მინიმუმამდე. მის პირად ექიმსაც არანაირი შეზღუდვა არ აქვს, დღის ნებისმიერ მონაკვეთში შეუძლია დრო გაატაროს პაციენტთან და დადოს შესაბამისი დასკვნა“, - განაცხადა ტიკარაძემ.