ბევრი მოშიმშილე არ მინახავს, მაგრამ ჩემი შვილი ვნახე და ძველებურად ვერ გამოიყურება - გიული ალასანია

საქართველოს მესამე პრეზიდენტი მიხეილ სააკაშვილი საკუთარი ოჯახის წევრებმა მოინახულეს. სააკშვილის შვილებმა და დედამ რუსთავის მე-12 პენიტენციურ დაწესებულება ცოტა ხნის წინ დატოვეს. როგორც მიხეილ სააკაშვილის დედამ გიული ალასანიამ განაცხადა, მისი შვილი უკვე 15 დღეა შიმშილობს.

„ჩემი შვილის ჯანმრთელობის მდგომარეობას ვერ შევაფასებ, მაგრამ ვიცი ის, რომ ადამიანი მე-15 დღეა შიმშილობს. ვიდრე ამ საკანში მოხვდებოდა, ის დღეები, როგორ ჩანს, არაფერი უჭამია. მე ბევრი მოშიმშილე არ მინახავს, მაგრამ ეს ვნახე და ძველებურად ვერ გამოიყურება. მე და მისი შვილები შევედით, ძალიან ცდილობდა, რომ კარგად და ყოჩაღად ყოფილიყო, მაგრამ ვერ არის ყოჩაღად. ექიმის შეფასება სხვა არის და მათ კარგად იციან, მაგრამ, ჩემი აზრით, ძველებურად ვერ არის“ , - განაცხადა ალასანიამ.