პრემიერი არის უძლიერესი პრემიერი - ელისო ბოლქვაძე

პრემიერი არის უძლიერესი პრემიერი - ასე უპასუხა პარლამენტის კულტურის კომიტეტის თავმჯდომარემ, ელისო ბოლქვაძემ ჟურნალისტების მიერ დასმულ შეკითხვას, რომელიც ირაკლი ღარიბაშვილის დღეს გავრცელებულ ღია წერილს ეხებოდა.

ჟურნალისტებმა ჰკითხეს ელისო ბოლქვაძეს, თუ რას ნიშნავს პრემიერ-მინისტრის წერილში მოქალაქეების წინააღმდეგ "მხუთავი აირის" დაანონსება.

"არ ვიცი არ მომისმენია. ბატონ ირაკლის უნდა ჰკითხოთ. არავითარ შემთხვევაში არ იმეტებს [საკუთარ მოსახლეობას]. პრემიერი არის უძლიერესი პრემიერი და არავითარ შემთხვევაში მე მაგას არ გეტყვით და ვერ წარმოვიდგენ. თქვენ მხოლოდ ამ ჭრილში გინდათ ჩემი ინტერვიუ. კი ბატონო პოლიტიკოსი ვარ, მაგრამ მე ვარ ის ადამიანი, რომელსაც მინდა, რომ ჩემი წვლილი შევიტანო კულტურის განვითარებაში", - თქვა ბოლქვაძემ.

დღეს, ირაკლი ღარიბაშვილმა წერილი გამოქვეყნა, სადაც აღნიშნავს, რომ სააკაშვილი საქართველოში არა ციხეში შესვლის გათვლით, არამედ ხელისუფლების გადატრიალების მყარი იმედით ჩამოვიდა. წერილში ის ასევე წერდა, რომ რუსთაველზე მიხეილ სააკაშვილის დაანონსებულ შეკრებას "პოლიცია წყლის ჭავლის ან მაქსიმუმ მხუთავი აირის გამოყენებით დაშლიდა".

მოგვიანებით, პრემიერ მინისტრმა წერილში "მხუთავი აირი" "ცრემლსადენი გაზით" ჩაანაცვლა.