ქვეყნის სტაბილურობას არ წაადგება არჩევნების გადატან-გადმოტანა, თუმცა ვითარება გვიკარნახებს გადაწყვეტილებას იმ შემთხვევაში, თუ ვერ შევინარჩუნებთ ტენდენციას სტაბილურობისკენ - პრეზიდენტი

ქვეყნის სტაბილურობას არ წაადგება არჩევნების გადატან-გადმოტანა, თუმცა ვითარება გვიკარნახებს გადაწყვეტილებას იმ შემთხვევაში, თუ ვერ შევინარჩუნებთ ტენდენციას სტაბილურობისკენ, – ნათქვამია საქართველოს პრეზიდენტის, სალომე ზურაბიშვილის მიმართვაში, რომელსაც პრეზიდენტის ადმინისტრაცია მარიამობის დღესასწაულთან დაკავშირებით ავრცელებს.

მიმართვაში პრეზიდენტი პანდემიის ვითარებაში არჩევნების ჩატარების საკითხს ეხება.

„მეკითხებიან არჩევნებზე რას ფიქრობთო. პასუხი მარტივია: აქაც ჩვენზეა დამოკიდებული, თუ რამდენად პასუხისმგებლობით მოვეკიდებით ამ საქმეს. ვფიქრობ, რომ ამ ქვეყნის სტაბილურობას არ წაადგება არჩევნების გადატან-გადმოტანა, და როგორც 2020 წელს შევძელით, დღესაც უნდა იყოს შესაძლებელი შესაბამისი ზომების მიღება, რათა საარჩევნო უბანზე ყველა უსაფრთხოების ნორმა იყოს დაცული, თუმცა ვითარება გვიკარნახებს გადაწყვეტილებას – იმ შემთხვევაში, თუ ვერ შევინარჩუნებთ ტენდენციას სტაბილურობისაკენ, რაც ბოლო დღეებში შეიმჩნევა.

ვაქცინაციის მაღალი ტემპი არ უნდა შენელდეს, ყველამ უნდა გამოვიჩინოთ მოქალაქეობრივი პასუხისმგებლობა და მჯერა, რომ შევძლებთ არჩევნებსაც და სკოლების ამოქმედებასაც. ერთიც და მეორეც ჩვენს ხელშია!“ – აცხადებს პრეზიდენტი.

სალომე ზურაბიშვილი მოქალაქეებს აცრისკენ მოუწოდებს და აღნიშნავს, რომ ვაქცინაციის შესახებ ცრუ ინფორმაციების პროპაგანდა ქვეყნის წინააღმდეგ მიმართული მიზანმიმართული ქმედებაა.

 "არ შემიძლია, არ ვიფიქრო, რომ უარყოფითი პროპაგანდა, რომელიც ცრუ ინფორმაციებს ავრცელებს და ცრუ შიშებს ბადებს, ჩვენი ქვეყნის საწინააღმდეგოდ მუშავდება და ვრცელდება.

ამიტომ მიმაჩნია, რომ როგორც ამ ქვეყნის პრეზიდენტს, მაქვს განსაკუთრებული მოვალეობა დაგარწმუნოთ ყველა: ერი და ბერი, ექიმი და ექთანი, პედაგოგი და სტუდენტი, დიდი და პატარა, რომ აცრა, ცოდვა კი არა – სამოქალაქო ვალდებულება და დღევანდელ დღეს პატრიოტიზმის უდიდესი გამოხატულებაა! თავისუფლება არ ნიშნავს სხვისი სიცოცხლის საფრთხის ქვეშ დაყენების თავისუფლებას!“ – აცხადებს პრეზიდენტი.