ერთი არგუმენტი ვერ მოიყვანე, ნულპროცენტიანო, ოროსანი იურისტი ხარ - დაპირისპირება პარლამენტში ლევან სამუშიასა და ოცნების წევრებს შორის

პარლამენტში ამნისტიის შესახებ კანონპროექტების განხილვას ხმაური მოყვა.

ადამიანის უფლებათა დაცვის კომიტეტში ამნისტიაზე მსჯელობა რამდენიმე საათია მიმდინარეობს.
"ლელოს" წარმომადგენელმა ლევან სამუშიამ სხდომაზე განაცხადა, რომ ოცნების წევრები 20 ივნისის ამნისტიის კანონით საკუთარი დანაშაულებების ამნისტირებას გეგმავენ.

"საკუთარი გუნდის, საკუთარი დანაშაულების ამნისტირებას აკეთებთ ამით. ეს პირდაპირ ლუსტრირებაა და ვერ ითმენთ, იმიტომ ვერ ითმენთ, რომ გარდაუვალია თქვენი გუნდის პასუხისმგებლობის საკითხი. გარდაუვალია ბრძანების გამცემების პასუხისმგებლობების საკითხი, გარდაუვალია ივანიშვილის პასდუხისმგებლობების საკითხი", - თქვა ლევან სამუშიამ.

ქართული ოცნების დეპუტატმა, ალუდა ღუდუშაურმა ლევან სამუშიას "შოუმენი" და "ოროსანი იურისტი" უწოდა.

"თქვენ თავს თუ ვერ იკავებთ, როგორც ჩანს მისამართი შეგეშალათ, სხვა გალაქტიკაში რომ ხართ, ეს ფაქტია, ხმას დაუწიე, შოუმენი ხარ, ერთი არგუმენტი ვერ მოიყვანე, ნულპროცენტიანო. ოროსანი იურისტი ხართ, წერა არ იცი, კითხვა არ იცი, მოსმენაც არ იცი", - უთხრა ღუდუშაურმა სამუშიას.