ასეთი ნაბიჯი არის გაუმართლებელი. სირცხვილია, როდესაც საერთო პასუხისმგებლობას ტოვებ - თალაკვაძე გახარიას გუნდზე

დღეს კიდევ ერთხელ დადასტურდა, რომ გიორგი გახარიამ იხელმძღვანელა პირადი ინტერესებით და მან თავისი მეგობრებიც დაარწმუნა ამაში, - განაცხადა საქართველოს პარლამენტის თავმჯდომარემ. არჩილ თალაკვაძის განმარტებით, რაც გიორგი გახარიას და მასთან კონკურენციას შეეხება, ეს ძირითადად დამოკიდებული იქნება იმაზე, რა პარტიას შექმნის, ვინ იქნება მის გუნდში და რა პოლიტიკურ პლატფორმას აირჩევენ ისინი.

თალაკვაძის თქმით, არსებობს ბევრი კითხვა, რომელზეც პასუხი გასაცემი იქნება. როგორც პარლამენტის თავმჯდომარე აცხადებს, გახარიას გუნდმა პასუხისმგებლობებზე უარი თქვა.

"დაველოდებით ვნახავთ რა პარტიას შექმნიან, რა იქნება მათი პოზიციონირება. არსებობს ძალიან ბევრი კითხვა და ამ კითხვებზე პასუხი იქნება გასაცემი. ასეთი ნაბიჯი არის გაუმართლებელი. უბრალოდ სირცხვილია, როდესაც საერთო პასუხისმგებლობას ტოვებ, გადიხარ აქედან და საუბრობ ზუსტად იმ პრობლემებზე, რომელზეც შენც გეკისრება პასუხისმგებლობა და შენც გაქვს ვალდებულება, რომ ამის მოსაგვარებლად იმუშაო", - აცხადებს თალაკვაძე.

მისივე თქმით, დაიკავებს თუ არა გიორგი გახარია ოპოზიციის ადგილს, ამას მოვლენების განვითარება აჩვენებს.

"არსებობს ძალიან ბევრი კითხვა და ამ კითხვებზე პასუხები იქნება გასაცემი. ვფიქრობ, მეტი სანერვიულო ოპოზიციას ექნება, რომელმაც უარი თქვა, ყოფილიყო პარლამენტში, აირჩია ქუჩა. ქუჩის პროექტი არის გაკოტრებული, რადგან საზოგადოება ამას მხარს არ უჭერს. პოლიტიკაში ასე ხდება, როცა ოპოზიცია კარგავს ადგილს, ამ ადგილს იკავებს სხვა, იქნება თუ არა ეს გიორგი გახარია, ამას გვიჩვენებს შემდეგი პროცესი“, – განაცხადა არჩილ თალაკვაძემ.