ეს იყო მიმდინარე კრების დროს გარედან შეჭრის მცდელობა, არავის აქვს კერძო საკუთრებაში შესვლის უფლება - ანდრია ჯაღმაიძე

საპატრიარქოს საზოგადოებასთან ურთიერთობის სამსახურის უფროსი მამა ანდრია ჯაღმაიძე ჭყონდიდის ეპარქიაში, განვითარებულ მოვლენებს ეხმიანება და ამბობს, რომ ეს იყო მიმდინარე კრების დროს გარედან შეჭრის მცდელობა, რაც ეკლესიას თანამედროვე ეპოქაში არ ახსოვს.

ის ამბობს, რომ ეპარქიის ახალ მიტროპოლიტს, მეუფე სტეფანეს სრულ მხარდაჭერას უცხადებს.

ეს არის გაუგონარი თავხედობა, ეს არის ეკლესიის ფეხქვეშ გათელვა და სიწმინდისა. მიმდინარეობდა კრება, სადაც უნდა ყოფილიყვნენ მხოლოდ სასულიერო პირები და მოხდა შეჭრა რეზიდენციაში.

ეს არის დევნა, არავის აქვს კერძო საკუთრებაში შესვლის უფლება და როდესაც კარს უმტვრევ და ვარდებიან შიგნით, რამდენად მიგაჩნიათ სწორად?

ვუცხადებთ სრულ მხარდაჭერას მეუფე სტეფანეს, ამას ვამბობთ ძალიან ბევრი მღვდელმთავრის სახელით, რომელიც გვიკავშირდებოდა. ხვალ უფრო მეტი სიცხადე იქნება. მრევლის პროტესტი არ ამართლებს რეზიდენციაში შეჭრას ძალით,"- განაცხადა ანდრია ჯაღმაიძემ.

მედიის წარმომადგენლების დაშავების შესახებ მამა ანდრია ჯაღმაიძე ამბობს, რომ ეს სამწუხარო ფაქტია. მისი თქმითმ იქ ჟურნალისტები არ უნდა ყოფილიყვნენ.

"ძალიან ვწუხვარ, რომ მოხდა ეს ინციდენტი, რომ ჯანმრთელობა დაუზიანდა ადამიანებს, მათ შორის ჟურნალისტებს - ეს სამწუხარო ფაქტია. ვუსურვებ მათ გამოჯანმრთელებას. აივანი საკმაოდ ვიწროა, ბევრი ხალხი იყო ასული, იქ არ უნდა ყოფილიყვნენ ჟურნალისტები", - თქვა მან.

შეგახსენებთ, ჭყონდიდის ეპარქიის რეზიდენციაში დღეს სასულიერო პირების შეხვედრა დაძაბულ ფონზე მიმდინარეობდა. ადგილზე მისული იყვნენ მრევლი და ის სასულიერო პირები, რომლებიც ახლადდანიშნული მეუფის მხრიდან, პეტრე ცაავას მხარდამჭერი ორი დიაკვნისთვის მღვდელმსახურების უფლების შეჩერებას აპროტესტებდნენ.

პროტესტის დროს რეზიდენციის აივნიდან, რამდენიმე მეტრის სიმაღლიდან მედიის წარმომადგენლები გადავარდნენ და დაშავდნენ.