ევროკავშირისთვის მნიშვნელოვანია, რომ საქართველომ თავისი ევროპული და დემოკრატიული გზა გააგრძელოს - სალომე ზურაბიშვილი

ევროკავშირისთვის მნიშვნელოვანია, რომ საქართველომ თავისი ევროპული და დემოკრატიული გზა გააგრძელოს და არაფერმა შეუშალოს ხელი, - აცხადებს საქართველოს პრეზიდენტი ევროპული საბჭოს პრეზიდენტთან შეხვედრის შემდეგ.

როგორც სალომე ზურაბიშვილმა განაცხადა, პრეზიდენტის ჩამოსვლა საქართველოში ნიშნავს, რომ ევროკავშირი არსად წასულა.

"მინდა, დიდი მადლობა მოვახსენო ევროპული საბჭოს პრეზიდენტს, შარლ მიშელს აქ ჩამოსვლისთვის. მე გავიხსენებ ორი თვის წინ ჩემს ვიზიტს ბრიუსელში, რომელიც იყო ძალიან მნიშვნელოვანი, როგორც პირველი პოსტკოვიდვიზიტი და ძალიან კარგი საუბარი გვქონდა მაშინაც. დღეს პრეზიდენტის ჩამოსვლა საქართველოში ნიშნავს, რომ ევროკავშირი არსად წასულა, აქ არის და როგორც არასოდეს, ევროკავშირისთვის მნიშვნელოვანია, რომ საქართველომ თავისი ევროპული და დემოკრატიული გზა გააგრძელოს და არაფერმა შეუშალოს ხელი. როგორც არასდროს, ეს მნიშვნელოვანია, გამომდინარე იქიდან, რომ ამ რეგიონში ვითარება შეიცვალა და საჭიროა, რომ რაც იყო და არის, საქართველო დემოკრატიის კუნძული, კიდევ უფრო გაძლიერდეს და გამყარდეს", - განაცხადა სალომე ზურაბიშვილმა.