FBI-ს ინფორმაციით, ამერიკის ყველა შტატში შეიარაღებული საპროტესტო აქციების გამართვა იგეგმება

საქართველო, თბილისი - 14:00 | 12.01.2021

ნანახია: 688

შეერთებული შტატების გამოძიების ფედერალური ბიურო FBI ფლობს ინფორმაციას, რომ ამერიკის ყველა შტატში იგეგმება შეიარაღებული საპროტესტო აქციები. ამის შესახებ ინფორმაციას წამყვანი მედიასაშუალებები FBI- ის მიერ მომზადებულ დოკუმენტზე დაყრდნობით ავრცელებენ.

დოკუმენტში წარმოდგენილი ინფორმაციით, ულტრამემარჯვენე რადიკალური დაჯგუფებები აპირებენ 16 იანვარს ვაშინგტონში გაემგზავრონ.

ნათქვამია, რომ თუ კონგრესი შეეცდება დონალდ ტრამპის გადაყენებას, რადიკალური ჯგუფები შეიარაღებულ აჯანყებას მოახდენენ.

დოკუმენტის თანახმად, ორგანიზებული ძალადობრივი თავდასხმების განზრახვის უკან დგას ექსტრემისტული მემარჯვენე დაჯგუფება, რომელიც Boogaloo-ს სახელით არის ცნობილი.

იუწყებიან, რომ რადიკალური ულტრამემარჯვენე დაჯგუფებები საპროტესტო აქციებს გეგმავენ 50-ვე შტატის საკანონმდებლო ორგანოს შენობებთან 16-დან 20 იანვრის ჩათვლით, ხოლო ვაშინგტონში, კაპიტოლიუმის შენობასთან 17-დან 20 იანვრის ჩათვლით.

გავრცელებული ცნობით, ძალადობრივი დაჯგუფებები ტრამპის იმპიჩმენტის შემთხვევაში შტატის სასამართლოებისა და საკანონმდებლო ორგანოების შენობების ხელში ჩაგდებას აპირებენ.

გამოძიების ფედერალური ბიურო აფრთხილებს შტატებისა და ადგილობრივ სამართალდამცავ ორგანოებს, რათა მოემზადონ რადიკალური მემარჯვენე ექსტრემისტების თავდასხმისთვის.

აღნიშნული ინფრომაციის გავრცელების კვალდაკვალ, დონალდ ტრამპის გადაწყვეტილებით, ვაშინგტონში 24 იანვრამდე საგანგებო მდგომარეობა გამოცხადდა.