ტრამპმა შესაძლოა, 2024 წლის საპრეზიდენტო არჩევნებში მიიღოს მონაწილეობა

აშშ-ის მოქმედმა პრეზიდენტმა დონალდ ტრამპმა შესაძლოა, 2024 წლის საპრეზიდენტო არჩევნებში მიიღოს მონაწილეობა. ამის შესახებ გამოცემა Politico იუწყება.

 „ეს იყო შესანიშნავი ოთხი წელი. ვეცდებით კიდევ ოთხი წელი გავხადოთ ასეთი. თუ არა, ისევ შევხვდებით ოთხი წლის შემდეგ“, - განაცხადა ტრამპმა რესპუბლიკური პარტიის ეროვნული კომიტეტის წევრების წინაშე სიტყვით გამოსვლისას.

იმის შესახებ, რომ ტრამპი 2024 წლის არჩევნებში მონაწილეობის მიღებას გეგმავდა, ცოტა ხნის წინ სხვადასხვა მედიასაშუალება იუწყებოდა. გაზეთი New York Times-ი წერდა, რომ ტრამპმა, შესაძლოა, 2024 წლის არჩევნებზე თავისი კანდიდატურა წამოაყნოს, როგორც კი დადასტურდება 2020 წლის არჩევნებში მისი ოპონენტის ჯო ბაიდენის გამარჯვება.

გამოცემა Daily Beast-ი წყაროზე დაყრდნობით იტყობინებოდა, რომ ტრამპმა, შესაძლოა, ინაუგურაციის დღეს ღონისძიება გამართოს , სადაც 2024 წლის არჩევნებზე თავისი კანდიდატურის წამოყენებაზე ისაუბრებს.