გუბაზ სანიკიძე, რომელიც ეთნიკურ შუღლს აღვივებდა, სააკაშვილს სომეხს ეძახდა, არის სიმპტომი, თუ როგორ დაემსგავსა სააკაშვილი ივანიშვილის ხედვას - ბოკერია

გუბაზ სანიკიძე, რომელიც სამარცხვინოდ ეთნიკურ შუღლს აღვივებდა, მიხეილ სააკაშვილს სომეხს ეძახდა, ჩვენი ქვეყნის მტრულ პროპაგანდას ეწეოდა, ახლა ეს კაცი და თავისი გზავნილებიც არის სიმპტომი იმისა, თუ როგორ დაემსგავსა სააკაშვილი და მისი გარემოცვა ივანიშვილის ხედვას, – ამის შესახებ „ევროპული საქართველოს“ წევრმა გიგა ბოკერიამ „პალიტრანიუსის“ ეთერში განაცხადა.

გიგა ბოკერია ეხმიანება გუბაზ სანიკიძის იმ განცხადებას, რომლის თანახმადაც, „მცხეთის იქით ხალხმა ბიძინას და მიშას მეტი არავინ იცის“.

„გუბაზ სანიკიძე, რომელიც სამარცხვინოდ ეთნიკურ შუღლს აღვივებდა, მიხეილ სააკაშვილს სომეხს ეძახდა, ჩვენი ქვეყნის მტრულ პროპაგანდას ეწეოდა, ეთნიკური ნიშნით დაყოფას და მოღალატე სომეხს ეძახდა, რომელიც მალავს თავის წარმოშობასო, ახლა ეს კაცი და თავისი გზავნილებიც არის სიმპტომი იმისა, თუ როგორ დაემსგავსა სააკაშვილი და მისი გარემოცვა ივანიშვილის ხედვას", - ამბობს ბოკერია.

მისი თქმით, პროპაგანდა, რომ თუ არ იქნება ივანიშვილი, იქნება სააკაშვილი, აწყობს როგორც ივანიშვილს, ისე სააკაშვილის გარემოცვას.

"ეს პროპაგანდა, რომ თურმე ივანიშვილის ალტერნატივა არის მხოლოდ სააკაშვილი და თუ ივანიშვილი არ იქნება, სააკაშვილი იქნება, აწყობს ივანიშვილს და აბსოლუტურად ბრიყვულად აწყობს სააკაშვილის გარემოცვასაც. პროპაგანდა, თუ ჩვენ არ ვიქნებით ძალაუფლებაში ისე, როგორც 2012 წლამდე „ნაციონალური მოძრაობა“ იყო ჩემი ჩათვლით, როცა ყველა შტოს ვაკონტროლებდით, რამაც სერიოზული პრობლემები მოგვიტანა ( შემდეგ ქვეყანა, საზოგადოება წინ წავიდა და აღარავის უნდა ეს), თურმე ამას ალტერნატივა არ აქვს, არის სიცრუე", - თქვა ბოკერიამ.