ბოლო ორი წლის განმავლობაში „ქართული ოცნება“ ხალხს დაშორდა - ეკა ბესელია

თავისუფალი სასამართლოს იდეა ბოლომდე მიყვანილი არ არის და „ქართულმა ოცნებამ“ შუა გზაზე მას ზურგი შეაქცია, - ამის შესახებ საქართველოს პირველ არხს დამოუკიდებელმა დეპუტატმა ეკა ბესელიამ „ქართული ოცნების“ რვაწლიანი მმართველობის შეფასებისას განუცხადა. მისი თქმით, "ქართული ოცნების" მმართველობის რვა წლის შემდეგ ისევ ცვლილებების დროა.

„პირველი ოქტომბერი არის ემოციური დღე და დღე, რითაც ერთი იდეის ირგვლივ გავერთიანდით. გვინდოდა, რომ ქვეყანაში სამართლიანი გარემო ყოფილიყო. თავისუფალი სასამართლოს იდეა ბოლომდე მიყვანილი არ არის და „ქართულმა ოცნებამ“ შუა გზაზე ზურგი შეაქცია. როგორც ჩანს, ძალაუფლებით ტკბობა იმდენად დიდი ცდუნებაა, რომ ხელისუფლებას უჭირს, დაინახოს ის, რომ ხალხის ნებას უნდა გაჰყვეს. აქ მოხდა კონფლიქტი იდეასთან. სამწუხაროდ, ბოლო ორი წლის განმავლობაში „ქართული ოცნება“ ხალხს დაშორდა. ეს გულდასაწყვეტია, რადგან ჩასაფრებულ პოზიციაში არ ვარ, ამ გუნდის ხელისუფლებაში მოყვანაში დიდი წვლილი მაქვს. სამწუხაროდ, ბევრს იმედები გაგვიცრუეს. რვა წლის შემდეგ, ისევ ცვლილებების დრო დადგა“, – დასძინა ბესელიამ.