მადრიდში COVID-19-ის პანდემიის დროს გარდაცვლილთა ხსოვნას პატივი მიაგეს

ესპანეთში COVID-19-ის პანდემიის დროს გარდაცვლილთა ხსოვნის პატივისცემის ნიშნად სამგლოვიარო ცერემონია გაიმართა.

ცერემონიას ესწრებოდა პრემიერი პედრო სანჩესი, მთავრობის წევრები. ასევე ევროსაბჭოს პრეზიდენტი შარლ მიშელი, ევროკომისიის პრეზიდენტი ურსულა ფონ დერ ლიაენი, ევროკავშირის უმაღლესი წარმომადგენელი საერთაშორისო საკითხებში ჟოზეფ ბორელი, ევროპარლამენტის თავმჯდომარე დევიდ სასოლი, ნატო-ს გენერალური მდივანი იენს სტოლტენბერგი, ჯანდაცვის მსოფლიო ორგანიზაციის გენერალური დირექტორი ტედროს ადჰანომ გებრეისუსი.  

ცერემონია ასევე იქცა იმ ადამიანებისადმი მადლიერების გამოხატვის დღედ, რიმლებმაც წვლილი შეიტანეს პანდემიასთან ბრძოლაში - უპირველს ყოვლისა, ეს არის სამედიცინო პერსონალი, ტრანსპორტი, პოლიცია, სამოქალაქო გვარდია, სურსათის მაღაზიების თანამშრომლები და ყველა ის ადამიანი, ვინც პამდემიის უმძიმეს თვეებში მუშაობდა.

ბარსელონელმა მედდამ თავის გამოსვლაში ისაუბრა ეპიდემიასთან ბრძოლის მძიმე დღეებზე.

 „ეს ძალიან რთული იყო, ჩვენ თავს უსუსურებად ვგრძნობდით, არ ვიყავით თვითდაჯერებულები, რადგან ყველაფრის სწავლა გზადაგზა გვიწევდა. ჩვენ გავეცით ყველაფერი, რაც გაგვაჩნდა, ვმუშაობდით შესაძლებლობების მიღმა. ბედნიერები ვართ, რომ ავირჩიეთ ეს პროფესია - სოცოცხლეზე ზრუნვა და მისი გადარჩენა“, - აღნიშნა მედდამ.

მისი თქმით, ყევლაზე მძიმე წუთები გარდაცვლილების ნახვა იყო, რომლებიც სიცოცხლის ბოლო წუთებში ახლობლებთან გამომშვიდობებას ვერ ასწრებდნენ.

ესპანეთი, ევროპაში ერთ-ერთი ყველაზე დაზარალებული ქვეყანაა პანდემიისაგან. ქვეყანაში გამოვლინდა კორონავირუსის 256 ათასი შემთხვევა, თუმცა ჯანდაცვის სამინისტროს მიერ ჩატარებულმა კველვებმა ანტისხეულებზე აჩვენა, რომ ვირუსი 2,3 მილიონმა ადამიანმა გადაიტანა. ოფიციალური მონაცემებით გარდაიცვალა 28, 400 ადამიანი.