საქართველოში კორონავირუსის ხუთი ახალი შემთხვევა იმპორტირებულია

საქართველოში გამოვლენილი კორონავირუსის ხუთი ახალი შემთხვევა იმპორტირებულია. ამის შესახებ თბილისის ინფექციური საავადმყოფოს სამედიცინო დირექტორმა მარინა ეზუგბაიამ განაცხადა.
მისივე თქმით, მათ შორის სამი სატვირთო ავტომანქანის მძღოლია.
„დღეს ხუთი ახალი შემთხვევა დაგვემატა, იყო 953 და ახლა გვყავს 958 დადასტურებული პაციენტი. გამოჯანმრთელებულების რიცხვი რვით გაიზარდა და ამჟამად არის 838. ხუთივე შემოტანილი შემთხვევაა. აქედან სამი არის სატვირთო ავტომანქანის მძღოლი, დანრჩენი ორი ჩვეულებრივი შემოსული მოქალაქეები არიან“, – აღნიშნა ეზუგბაიამ.

ეზუგბაიას განმარტებით, გამოჯანმრთელებულების რაოდენობა უკვე 87.5 პროცენტია, ამ ეტაპზე კოვიდ-ცენტრებში კი 105 პაციენტი რჩება.

თბილისის ინფექციურ საავადმყოფოში, გუშინ კლინიკას ორი ახალი შემთხვევა დაემატა, კიდევ ორი პაციენტი კი გამოჯანმრთელდა. შესაბამისად, ინფექციურ საავადმყოფოში კვლავ 24 კოვიდინფიცირებული მკურნალობს.

ბოლო ინფორმაციით, საქართველოში COVID-19-ით ინფიცირებულთა რაოდენობა 958-მდე გაიზარდა.

stopcov.ge-ის მონაცემებით, დღეისათვის ქვეყანაში COVID-19-ის 958 შემთხვევაა გამოვლენილი, მათ შორის გამოჯანმრთელებულია 838 პაციენტი, ხოლო გარდაიცვალა - 15.

კარანტინის რეჟიმში იმყოფება 3903 ადამიანი, ხოლო სტაციონარში მეთვალყურეობის ქვეშ - 192.

უცხოეთიდან სამკურნალოდ გადმოყვანილი საქართველოს მოქალაქეების რაოდენობა კი შეადგენს -3.