ნიუ იორკის შტატში კორონავირუსით გარდაცვლილთა რაოდენობა კლებას განაგრძობს

ნიუ იორკის შტატში ბოლო 24 საათში კორონავირუსით 438 ადამიანი გარდაიცვალა, წინა 24 საათში გარდაცვალების 474 შემთხვევა დაფიქსირდა. ამის შესახებ შტატის გუბერნატორმა ენდრიუ კუომომ განაცხადა.

ნიუ იორკის შტატი აშშ-ში ეპიდემიის ცენტრს წარმოადგენს.

 „გარდაცვლილთა რაოდენობა უზომოდ ტრაგიკულია - 438. ეს მაჩვენებელი ისე სწრაფად არ იკლებს, როგორც ჩვენ გვსურს“, - განაცხადა კუომომ.

გუბერნატორმა აღნიშნა, რომ ჰოსპიტალიზაციის დონე კლებას ისევ განაგრძობს, ამასთან, ახალი შემთხვევები დაახლოებით იგივე დონეზე დგას.

კუომოს განცხადებით ჰოსპიტალიზირებულთა რიცხვი 22 აპრილს  15 021-ს შეადგენდა, ერთი დღით ადრე კი - 15 599-ს.