ბორის ჯონსონის ორსულ საცოლეს კორონავირუსი დაუდგინდა

ბრიტანეთის პრემიერ მინისტრის ბორის ჯონსონის ორსულმა საცოლემ კერი საიმონდსმა განაცხადა, რომ კორონავირუსის სიმპტომების გამო უკვე ერთი კვირაა თვითიზოლაციაში იმყოფება.

 „გასული კვირა საწოლში გავატარე კორონავირუსის სიმპტომების გამო. ჩემთვის საჭირო არ იყო ტესტის ჩატარება, შვიდდღიანი დასვენების შემდეგ თავს უკეთ ვგრძნობ და ჩემი მდგომარეობა უმჯობესდება“, - დაწერა საიმონდსმა Twitter-ზე.

მან აღნიშნა, რომ ცხადია ძალიან სანერვიულოა COVID-19-ით დაავადება ორსულობის დროს.

თავად ბრიტანეთის პრემიერი უკვე ერთი კვირაა კორონავირუსით დაინფიცირების გამო თვითიზოლაციაში იმყოფება.

55 წლის ჯონსონმა და მისმა 31 წლის მეგობარმა ქალმა კერი საიმონდსმა რამდენიმე  ხნის წინ განაცხადეს, რომ დაინიშნენ და შვილს ზაფხულის დასაწყისში ელოდებიან. საიმონდსმა Instagram-ზე დაწერა, რომ ნიშნობა გასული წლის ბოლოს შედგა.

მათი რომანი ჯონსონისა და მისი მეუღლის მარინა უილერის განქორწინების მიზეზი გახდა. ბორის ჯონსონს მარინასთან ქორწინებაში ოთხი შვილი ჰყავს.