ზედაპირზე კორონავირუსის სიცოცხლის ხანგრძლივობა დასახელდა

კორონავირუსმა  ზედაპირზე, შესაძლოა 17 დღის განმავლობაში იცოცხლოს. ამის შესახებ აშშ-ის დაავადების კონტროლის ცენტრის ანგარიშშია ნათქვამი.

სპეციალისტებმა შეისწავლეს COVID-19-ით დაავადების შემთხვევები სამ საკრუიზო ლაინერზე. პუბლიკაციაში ნათქვამია, რომ ხომალდი ხშირად ხდება ინფექციური დაავადებების წყარო დახურული სივრცის გამო, სადაც იმყოფებიან მგზავრები სხვადასხვა ქვეყნიდან.

საკრუიზო ლაინერ Diamond Princess-ის დათვალიერების შემდეგ, სადაც თებერვალში კორონავირუსით დაავადდა 700-ზე მეტი ადამიანი, მეცნიერებმა დაასკვენეს, რომ COVID-19-ის გამომწვევმა ზედაპირზე შესაძლოა ორ კვირაზე მეტ ხანს გაძლოს. კერძოდ, კონკრეტულად ამ ლაინერზე COVID-19  ჩვიდმეტი დღის შემდეგ აღმოაჩინეს, მას შემდეგ რაც მგზავრებმა ყველა კაიუტა გაათავისუფლეს.

ამასთან, დოკუმენტში აღნიშნულია, რომ ჯერჯერობით უცნობია დაავადდა თუ არა Diamond Princess-ის რომელიმე მგზავრი ინფიცირებული ნივთებიდან.

Diamond Princess-ი იაპონიის ქალაქ იოკოჰამადან 20 იანვარს გავიდა და 3 თებერვალს დაბრუნდა. ორი დღის შემდეგ ლაინერი ორკვირიან კარანტინში გააჩერეს, კორონავირუსით ინფიცირებული ჩინელის გამო.  ბორტზე 3 711 ადამიანი იმყოფებოდა, მათ შორის დაინფიცირდა 712, ხოლო გარდაიცვალა 10 ადამიანი.