ანგელა მერკელმა განაცხადა, რომ ნაცისტების მიერ ჩადენილი დანაშაულებების გამო რცხვენია

გერმანიის კანცლერმა ანგელა მერკელმა აღიარა, რომ ნაცისტების მიერ ჩადენილი დანაშაულებების გამო სირცხვილის გრძნობა სტანჯავს. ამის შესახებ მან  აუშვიც-ბირგენაუს ყოფილ ნაცისტურ საკონცენტრაციო ბანაკის ადგილზე აშენებულ მუზეუმში სიტყვით გამოსვლისას განაცხადა.

 „აქ, გერმანიის კანცლერის როლში ყოფნა და სიტყვით გამოსვლა მძიმეა, ეს ჩემთვის ადვილი არ არის. განვიცდი დიდ სირცხვილს, როდესაც ვაცნობიერებ აქ გერმანელების მიერ ჩადენილ სასტიკ დანაშაულებებს“, - აღნიშნა მერკელმა ღონისძიებაზე, რომელიც აუშვიც-ბირკენაუს ფონდის 10 წლისთავს მიეძღვნა.

კანცლერის თქმით, ოსვენციმი ეს არის „ადგილი, რომელიც წარმოადგენს კაცობრიობის ისტორიაში ჩადენილი უდიდესი დანაშაულის სიმბოლოს“.  „ჩვენ უნდა გვახსოვდეს დანაშაულებები, რომლებიც ამ ადგილზე მოხდა“, - განაცხადა მერკელმა.

მისი თქმით, ყოფილი ნაცისტური საკონცენტრაციო ბანაკის ისტორია გერმანიის ისტორიის ნაწილია, რომელზეც ყოველთვის უნდა ვისაუბროთ. „ეს გერმანიის ისტორიის ნაწილია, რომელზეც უნდა ვისაუბროთ, რადგან ვიყოთ ფხიზლად, რათა ეს დანაშაულებები არასადროს განმეორდეს“, - განაცხადა გერმანიის კანცლერმა.

ანგელა მერკელი გერმანიის მესამე კანცლერია, რომელიც ოსვენციმში ჩავიდა. მანამდე აქ იმყოფებოდნენ ჰელმუტ შმიდტი და ორჯერ ჰელმუტ კოლი.