სტოლტენბერგი მხარს უჭერს გერმანიის იდეას სირია-თურქეთის საზღვარზე უსაფრთხოების საერთაშორისო ზონის შექმნის შესახებ

ნატო-ს გენერალური მდივანი იენს სტოლტენბერგი აცხადებს, რომ გერმანიის თავდაცვის მინისტრის იდეა ჩრდილოეთ სირიაში უსაფრთხოების საერთაშორისო ზონის შექმნის შესახებ, შესაძლოა სიტუაციის დარეგულირების ერთ-ერთი ელემენტი გახდეს.

 „არსებობს უამრავი გამოწვევა, მაგრამ საერთაშორისო საზოგადოების მიერ შეთანხმებული ჩარჩოების შექმნის იდეა  სირიის ჩრდილოეთ-აღმოსავლეთით სიტუაციის დარეგულირებისთვის - ეს ის არის, რასაც მოლაპარაკებებზე თავდაცვის მინისტრები განიხილავენ. ყველა მოკავშირე მხარს უჭერს კრიზისის მოლაპარაკებების გზით გადაჭრას. გერმანიის წინადადება ამის ერთ-ერთი ელემენტია“, - განაცხადა სტლტენბერგმა ნატო-ს შტაბ-ბინაში მინისტრების შეხვედრის დაწყების წინ.

გერმანიის თავდაცვის მინისტრმა ანეგრეტ კრამპ-კარენბაუერმა განაცხადა, რომ სირია-თურქეთის საზღვარზე უნდა შეიქმნას უსაფრთხოების ზონა. მისი თქმით, სირიაში არსებული ვითარება ნეგატიურად აისახება ევროპისა და კერძოდ გერმანიის ინტერესებზე უსაფრთხოების კუთხით. მინისტრმა აღნიშა, რომ ამ დრომდე ბერლინისა და ბრიუსელის ქმედებები ზემეტად პასიური იყო, ამიტომ მისი თქმით, გერმანიის „იმპულსსა და პოლიტიკურ ინიციატივას აზრი აქვს“.