კანადის პრემიერმა ყავისფერი გრიმისთვის ბოდიში მოიხადა

კანადის პრემიერ მინისტრმა ჯასტინ ტრიუდომ 18 წლის წინ გადაღებული ფოტოსთვის ბოდიში მოიხადა. ფოტოზე ის აღბეჭდილია თეთრი ჩალმით, სახეზე კი ყავისფერი გრიმი უსვია. ფოტო ჯასტინმა კერძო სკოლის წვეულებაზე გადაიღო. ფოტოსურათი ჟურნალმა Time-მა გამოაქვეყნა.

ფოტო გადაღებულია 2001 წელს, ვანკუვერის ელიტურ აკადემია ვესტ-პოინტ-გრეიში, სადაც ის პედაგოგად მუშაობდა.

ჟურნალში გამოქვეყნების შემდეგ ტრიუდომ ჟურნალისტებს განუმარტა, რომ ყავისფერი გრიმი და ალადინის კოსტიუმი გალა-საღამოსთვის დასჭირდა, რომელიც „არაბული ღამეების“ თემას ეძღვნებოდა.

მან აღიარა, რომ ფოტოსურათი რასისტული იყო. პრემიერი ამის გამო ძალიან სწუხს და ამბობს, რომ იმ დროს ამაზე კარგად უნდა დაფიქრებულიყო.