„მიცვალებულები“ და „გათხოვებისთვის უპერსპექტივოები“ - ტელეწამყვანი ჭარბწონიანების მიმართ გამონათქვამების გამო სამუშაოს ჩამოაშორეს

ცნობილი ეგვიპტელი ტელეწამყვანი რიჰამ საიდი ერთი წლით სატელევიზიო ეთერს ჩამოაშორეს ჭარბწონიანების მიმართ გამონათქვამების გამო, რომლებიც ქვეყანაში შეურაცხმყოფელად მიიჩნიეს. იუწყება ტელეარხი Sky News Arabia. შესაბამისი გადაწყვეტილება ეგვიპტის მედიასაშუალებების მარეგულირებელმა უმაღლესმა საბჭომ მიიღო.

ახალგაზრდებისთვის განკუთვნილ ერთ- ერთ გადაცემაში რიჰამ საიდმა უხეშად მოიხსენია ჭარბწონიანი ადამიანები. მისი შეურაცხმყოფელი გამოსვლა ყველაზე მეტად შეეხო ქალებს, რომლებსაც საიდმა უწოდა „ტვირთი ოჯახისა და ქვეყნისთვის“, „მიცვალებულები“, „უშნოები“ და „გათხოვებისთვის უპერსპექტივოები“.

წელეწამყვანის თავშეუკავებელმა კრიტიკამ ეგვიპტურ საზოგადოებაში უკმაყოფილების ტალღა გამოიწვია. რიჰამ საიდს რასიზმსა და სხვა ადამიანების დამცირებაში ადანაშაულებდნენ.

შთამბეჭდავი სილამაზით გამორჩეულ ტელეწამყვანს თავის მართლება მოუწია. „ჩემი სიტყვები სხვაგვარად გაიგეს. მინდოდა მეთქვა, რომ ჭარბი წონა მავნებელია ჯანმრთელობისათვის და არა დამეცინა ან განმესაჯა ჭარბწონიანი ადამიანები“, -დაწერა წამყვანმა სოციალურ ქსელში. მისი თქმით, ოდესღაც ისიც იტანჯებოდა ზედმეტი წონის გამო, მაგრამ ერთმა შემთხვევითმა შეხვედრამ და მისი სიმსუქნის გამო გამოთქმულმა შენიშვნამ სრულად შეცვალა რიჰამის ცხოვრება და დაეხმარა მას ლამაზი გამხდარიყო.