ჰამენეი ბრიტანეთს გიბრალტარში ხომალდის დაკავების გამო ემუქრება

ირანის უმაღლესმა ლიდერმა აიათოლა ჰამენეიმ განაცხადა, რომ ირანი გიბრალტარში ნავთობის ტანკერ Grace 1-ის დაკავებას უპასუხოდ არ დატოვებს.

 „ბრიტანეთის მანკიერმა მთავრობამ მიმართა მეკობრეობას და თავს დაესხა ჩვენს ხომალდს, მათ ჩაიდინეს დანაშაული და დააკანონეს ის. ისლამური რესპუბლიკა და ირანის ისტებლიშმენტის ღვთისმოსავი წევრები ამგვარ უსმგავსობას უპასუხოდ არ დატოვებენ“, - დაწერა ჰამენეიმ მიკრობლოგ Twitter-ში.

4 ივლისს ბრიტანული გიბრალტარის ხელისუფლებამ ირანის სუპერტანკერი დააკავა. მისი განცხადებით, ტანკერს ნედლი ნავთობი სირიაში გადაჰქონდა, რასაც ირანის ხელისუფლება უარყოფს.

როგორც გიბრალტარის მთავარმა მინისტრმა ფაბიან პიკარდომ განაცხადა, ასეთი ზომების გატარება აუცილებლი იყო ინფორმაციის მიღების შედეგად, რომელიც გიბრალტარის ხელისუფლებას აძლევდა გონივრული ეჭვის საფუძველს, რომ ხომალდი Grace 1 მოქმედებდა ევროკავშირის მიერ სირიის წინააღმდეგ დაწესებული სანქციების დარღვევებით.

პოლიციამ გამოძიების ფარგლებში დააკავა ტანკერის კაპიტანი და უფროსი თანაშემწე, ასევე ეკიპაჟის კიდევ ორი წევრი.

ირანის საგარეო საქმეთა მინისტრმა აბას მუსავიმ განაცხადა, რომ თეირანი მიუღებლად მიიჩნევს ტანკერის დაკავებას იმ სანქციების გამო, რომლებიც არ ეფუძნება გაეროს გადაწყვეტილებებს. საგარეო უწყების განცხადებით, ტანკერს ნავთობი სირიაში არ გადაჰქონდა.