ბათუმში, გარემოვაჭრეების აქციაზე პოლიციამ ერთი ქალი დააკავა

ბათუმში, გარემოვაჭრეების აქციაზე პოლიციამ ერთი ქალი დააკავა. შს სამინისტროში აქციის მონაწილის დაკავებას ადასტურებენ. 

აქცია ბათუმის მერიასთან იმართება. მისი მონაწილეები გარევაჭრობის აკრძალვას აპროტესტებენ და სამუშაო ადგილების მოთხოვნით აქციას ბათუმის მერიასთან მართავენ. აქციაზე ვითარება მას შემდეგ დაიძაბა, რაც გარემოვაჭრეებმა წერეთლის ქუჩიდან ჭავჭავაძის გამზირისკენ გადაინაცვლეს, გზის სავალ ნაწილზე გადავიდნენ და გზის გადაკეტვა სცადეს.

ბათუმის მერიის წინ მიმდინარე საპროტესტო აქციის წარმომადგენლების შეხვედრა ბათუმის მერთან, ლაშა კომახიძესთან უშედეგოდ დასრულდა.

უკანონო გარემოვაჭრეების დახლებისგან წერეთლის ქუჩა და მიმდებარე ტერიტორია  გუშინ გათავისუფლდა. გარემოვაჭრეებს თავიანთი საქმიანობის გასაგრძელებლად მაიაკოვსკის ქუჩაზე მდებარე ავტოსადგურის ტერიტორია გამოუყვეს.  მერიის განცხადებით, ქაოტურად მოწყობილი უკანონო გარევაჭრობა მუდმივად იწვევდა სატრანსპორტო მოძრაობის გადატვირთვას და ანტისანიტარიას, რაც წერეთლის ქუჩაზე მცხოვრებ მოსახლეობას პრობლემებს უქმნიდა.

გარემოვაჭრეები ორი თვით წერეთლის ქუჩაზე ვაჭრობის გაგრძელების ნებართვას ითხოვენ.