ნაძვის ხისთვის ადგილის შეცვლის შესახებ ინფორმაციას თბილისის მერია არ ადასტურებს

თბილისის მერიაში არ ადასტურებენ გავრცელებულ ინფორმაციას იმის შესახებ, რომ საახალწლო ნაძვის ხის განთავსების ადგილი შესაძლოა შეიცვალოს და ის პარლამენტის შენობის ნაცვლად სხვაგან დაიდგას.

უწყების პრესსამსახურში ამბობენ, რომ ამ საკითხთან დაკავშირებით არანაირი გადაწყვეტილება მიღებული არ არის.

"არ არის სწორი ინფორმაცია. არ ადასტურებს თბილისის მერია გავრცელებულ ინფორმაციას. არანაირი გადაწყვეტილება ამ საკითხთან დაკავშირებით მიღებული არ არის. ჯერ ადრეა და როგორც მერმა თქვა, როცა ამის განხილვის დრო დადგება, მერია მოსახლეობასთან ერთად მიიღებს გადაწყვეტილებას", - აღნიშნავენ მერიის პრესსამსახურში.

ინფორმაცია იმის შესახებ, რომ საახალწლო ნაძვის ხე რუსთაველის გამზირის ნაცვლად შეიძლება სხვაგან განთავსდეს, ერთ-ერთმა სააგენტომ გაავრცელა.

ზაზა სარალიძის თქმით, მან 1 ნოემბერს მიმართა მერიას აქციის გაგრძელებასთან და კარვების განთავსებასთან დაკავშირებით, საპასუხოდ კი მიიღო წერილი, რომ 7 დეკემბრიდან ლოკაცია შეცვალონ, რადგან რუსთაველის გამზირზე ნაძვის ხის დადგმა იგეგმება. სარალიძე ამბობს, რომ ამ მოთხოვნის გათვალისწინებას არ აპირებს.