თმენის ვალდებულება მართლა დეპუტატებს გვაქვს, ასეთ თავმჯდომარეს რომ ვითმენთ - დავით ჭიჭინაძე

„თმენის ვალდებულება მართლა დეპუტატებს გვაქვს, ასეთ თავმჯდომარეს რომ ვითმენთ,“ - ამის შესახებ განცხადება საპარლამენტო უმრავლესობის წევრმა, დავით ჭიჭინაძემ, დღეს პარლამენტში, საგანგებოდ გამართულ პრესკონფერენციაზე გააკეთა.

ჭიჭინაძე პრესკონფერენციით პარლამენტის თავმჯდომარის გუშინდელ განცხადებას გამოეხმაურა, სადაც კობახიძე ჭიჭინაძის მიერ შრომის უსაფრთხოების კანონთან დაკავშირებით გაკეთებულ განცხადებას არასწორ ინფორმაციას უწოდებს.

ჭიჭინაძის თქმით, კობახიძის ბოლო პერიოდში გაკეთებული განცხადებებიდან ირკვევა, რომ ის „ახალი კონსტიტუციის ავტორობას უბრალოდ იჩემებდა“.

"თმენის ვალდებულება მართლა დეპუტატებს გვაქვს, რომ ასეთ თავმჯდომარეს ვითმენთ. აქამდე ვიცოდი, რომ ის იყო კონსტიტუციის ავტორი, ამას იჩემებდა, მაგრამ როგორც ირკვევა, თურმე მთავრობა არ აძლევდა მუშაობის საშუალებას. მაჟორიტარებთან დაკავშირებით, მიწის არ გაყიდვასთან დაკავშირებით ჩვენი ინიციატივები იყო, საბანკო ჩანაწერების გასწორებასთან დაკავშირებით - ჩემი და კონკრეტული არასამთავრობო ორგანიზაციის. გამოდის, რომ ეს ადამიანი პრაქტიკულად იბრალებს იმას, რაც არ გაუკეთებია. ჩემთვის გაუგებარია, თუ ამ კონსტიტუციას კვირიკაშვილის კონსტიტუცია ჰქვია და ერთ ადამიანზეა მორგებული, მაშინ გამოდის, რომ კონსტიტუცია არასწორად მიგვიღია," - განაცხადა ჭიჭინაძემ.

რაც შეეხება მის მიერ კობახიძის გადადგომის საკითხის გაჟღერებას, ჭიჭინაძემ განაცხადა, რომ კობახიძის მეთაურობით პარლამენტს დაბალი რეიტინგი აქვს.