ავტოსაგზაო შემთხვევის დროს დაშავებულებს განათლების მინისტრის მოადგილე მოინახულებს

გომბორის გზაზე ავარიის დროს დაშავებულებს თელავის რეფერალურ საავადმყოფოში განათლებისა და მეცნიერების მინისტრის მოადგილე ლია გიგაური მოინახულებს.

მინისტრის მოადგილე თელავში უკვე გაემგზავრა. დაშავებულებს მოინახულებს ასევე შს მინისტრის მოადგილე მერაბ მალანია. თელავის საავადმყოფოში ავარიის დროს დაშავებული შვიდი ადამიანი გადაიყვანეს. როგორც კლინიკის ხელმძღვანელმა განაცხადა, არც ერთი მათგანი რეანიმაციულ განყოფილებაში არ იმყოფება.

ავტოსაგზაო შემთხვევასთან დაკავშირებით, შსს-ს განცხადებას ავრცელებს. 

"შინაგან საქმეთა სამინისტროს გადაუდებელი დახმარების ოპერატიულ მართვის ცენტრ „112“-ში შემოვიდა შეტყობინება, რომ გომბორის უღელტეხილზე თელავის რაიონის სოფელ თეთრი წყლების მიმდებარედ, კახეთის მიმართულებით მოძრავი მიკროავტობუსი, რომელშიც თბილისის 175-ე საჯარო სკოლის მე-6 კლასის მოსწავლეები მშობლებთან ერთად იმყოფებოდნენ საავტომობილო გზიდან გადავიდა და ამობრუნდა.

შეტყობინების მიღებისთანავე ადგილზე გამოცხადდნენ, როგორც შინაგან საქმეთა სამინისტროს თანამშრომლები, ასევე, სასწრაფო სამედიცინო დახმარების და სამაშველო ჯგუფები.

გამოძიების პირველადი ინფორმაციით, ავტომანქანის მძღოლმა საჭე ვერ დაიმორჩილა, საავტომობილო გზიდან გადავიდა და ხევში გადავარდა. ავტოსაგზაო შემთხვევის შედეგად გარდაცვლილია 4 ადამიანი, მათ შორის ერთი არასრულწლოვანია. სხეულის სხვადასხვა სახის დაზიანება მიიღო 16 ადამიანმა, რომლებიც უკვე გადაყვანილები არიან სამედიცინო დაწესებულებაში.

მომხდარ ფაქტთან დაკავშირებით გამოძიება სსკ-ს 276-ე მუხლის მე-7 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია. დანაშაული 6-დან 10 წლამდე თავისუფლების აღკვეთას ითვალისწინებს.

საქმესთან დაკავშირებით დანიშნულია შესაბამისი ექსპერტიზები და მიმდინარეობს აქტიური საგამოძიებო მოქმედებები. ამ დროისთვის ავტომანქანის მძღოლი გამოკითხვის მიზნით გადაყვანილია პოლიციის განყოფილებაში", - ნათქვამია შსს-ს განცხადებაში.