საფრანგეთი ბრიტანეთს ეთანხმება, რომ სკრიპალის მოწამვლაზე პასუხისმგებელი რუსეთია

საფრანგეთის პრეზიდენტი ემანუელ მაკრონი დიდი ბრიტანეთის დასკვნებს ეთანხმება იმის შესახებ, რომ ყოფილი ჯაშუშის სერგეი სკრიპალის მოწამვლის უკან რუსეთი დგას. ამის შესახებ ელისეის სასახლეში განაცხადეს.

 „დიდი ბრიტანეთი დეტალურ ინფორმაციას აწვდის საფრანგეთს ბრიტანელი გამომძიებლების მიერ შეგროვებული მტკიცებულებების შესახებ, ასვე იმ ელემენტების შესახებ, რომელიც ამ თავდასხმაზე რუსეთის პასუხისმგებლობაზე მიუთითებს. საფრანგეთი ეთანხმება დიდი ბრიტანეთის დასკვნებს იმის შესახებ, რომ მომხდარის სხვა დამაჯერებელი ახსნა არ არსებობს“, - ნათქვამია საფრანგეთის პრეზიდენტის კანცელარიის კომუნიკეში.

მაკრონი ტელეფონით ესაუბრა დიდი ბრიტანეთის პრემიერ-მინისტრს ტერეზა მეის და სკრიპალის სიტუაციასთან დაკავშირებით ბრიტანეთისადმი სოლიდარობა გამოხატა.

თუმცა მანამდე, ბრიტანული გამოცემა The Times-ი წერდა, რომ მაკრონის პრეს-მდივნის ბენჯამინ გრივოს განცხადებით. პარიზი ჯერ მზად არ იყო თავისი საბოლოო პოზიცია გამოეხატა აღნიშნულ საქმეზე  და ლონდონის მიერ მტკიცებულებების წარდგენას ელოდებოდა.