სტალინი ჩემმა ბებიამ გადაარჩინა - სააკაშვილი

საქართველოს ექს-პრეზიდენტმა მიხეილ სააკაშვილმა ფილმს „სტალინის სიკვდილი“ „სუპერ მაგარი“ უწოდა.

თავისი შთაბეჭდილებები ბრიტანელი რეჟისორის არმანდო იანუჩის კომედიის ნახვის შემდეგ Facebook-ის გვერდზე გააზიარა.

 „ვიყავით კინოში „სტალინის სიკვდილის“ სანახავად. სუპერ მაგარი ფილმი“, - წერს საქართველოს ყოფილი პრეზიდენტი.

ამასთან ის იხსენებს, რომ მისმა დიდმა ბებიამ სტალინი ჟანდარმებისგან იხსნა. „ჩემი დიდი ბებია თამარი მიყვებოდა, როგორ გადაარჩინა სტალინი მეფის ჟანდარმებისგან. ის ხელით მამამისის - მდიდარი მეწარმის სახლიდან გამოიყვანა, სტალინმა კი სიკეთე მის ოჯახს ქონების კონფისკაციითა და მამისა და ძმის განადგურებით გადაუხადა“, - ამბობს სააკაშვილი.  

 „სტალინის სიკვდილი“ - სატირული კომედიაა, რომელიც საბჭოთა ლიდერის გარდაცვალების შემდეგ ხელისუფლებისათვის ბრძოლის შესახებ მოგვითხრობს. ფილმის მსოფლიო პრემიერა სექტემბერში ტორონტოში გაიმართა. ფილმში ჯეისონ აიზექსი, ოლგა კურილენკო, სტივ ბუშმი და რუოერტ ფრენდი მონაწილეობენ.