NDI-ის დირექტორის განცხადება წარმოადგენდა აშშ-ის პრეზიდენტის და არა ჩვენი ქვეყნის კრიტიკას - ოთარ კახიძე

,,ევროპული საქართველოს“ წევრი ოთარ კახიძე საპარლამენტო  უმრავლესობის წევრ ირაკლი მეზურნიშვილის მიერ  საერთაშორისო დემოკრატიული ინსტიტუტის ხელმძღვანელის, ლორა ტორტორნისადმი გამოთქმულ ბრალდებას ეხმიანება.

,,NDI-ის დირექტორის განცხადება წარმოადგენდა ამერიკის პრეზიდენტის კრიტიკას ამერიკის მოქალაქის მხრიდან და არანაირად არ უკავშირდება საქართველოს ინტერესებს და ჩვენი ქვეყნის კრიტიკას. თუკი რამემ დააზარალა საქართველოს ინტერესები საერთაშორისო ასპარეზზე ეს არის ,,ქართული ოცნების“  ხუთწლიანი პოლიტიკა დეკლარირებული, რომ საქართველო აღარ უნდა იყოს დისკუსიის საგანი დასავლეთსა და რუსეთს შორის,’’- განაცხადა  ოთარ კახიძემ.

ირაკლი მეზურნიშვილმა ლორა ტორტონის მიერ გაკეთებული განცხადების გამო, მისგან საჯაროდ ბოდიშის მოხდა მოითხოვა.

ცნობისათვის, ტორნტონმა რამდენიმე დღის წინ სოციალურ ქსელში დაწერა, რომ ტრამპი რუკაზე საქართველოს დიდი ალბათობით ვერც იპოვის.

”გასულ ღამეს, "იმედის" ჟურნალისტმა სიტყვასიტყვით მკითხა, ხომ არ გეგმავდა NDI-ი აშშ-ის და რუსეთის სამხედრო ძალებზე კითხვის ფორმულირებით ამერიკის პრეზიდენტის რუსეთთან დაპირისპირების ლობირებას. ხმამაღლა გამეცინა. ტრამპი რუკაზე საქართველოს დიდი ალბათობით ვერც იპოვის, არათუ თვალს ადევნებს აქ ჩატარებული კვლევის შედეგებს! მაგრამ მე მომწონს ვარაუდი, თითქოს ამხელა გავლენა გვაქვს!”, - დაწერა ლორა თორნტონმა.