დაკარგული მალაიზიური თვითმფრინავის საძიებო ოპერაცია განახლდება

ამერიკული კომპანია Ocean Infinity მალაიზიური ლაინერის MH370-ის ახალ საძიებო ოპერაციას შეუდგება. თვითმფრინავი 2014 წელს დაიკარგა.

იანვრის დასაწყისში გავრცელდა ინფორმაცია, რომ მალაიზიის მთავრობამ თანხმობა განაცხადა, კომპანია Ocean Infinity-ის მონაწილეობით თვითმფრინავის ძებნის განახლების შესახებ. ლაინერის ნამსხვრევების საძიებო ოპერაცია ოფიციალურად გასული წლის იანვარში შეწყდა.

ოპერაცია 90 დღეს გაგრძელდება. მასში მონაწილეობას 65 ადამიანი, მათ შორის მალაიზიის საზღვაო სამხედრო ძალების ორი წარმომადგენელიც ჩაერთვება.

კომპანია Ocean Infinity პრემიას ოპერაციის წარმატებით დასრულების შემთხვევაში მიიღებს.

2014 წლის 8 მარტს ავიაკომპანია  Malaysia Airlines-ის ავიალაინერი Boeing 777-200, რომელიც კუალა-ლუმპურიდან პეკინში მიფრინავდა, რადარების ეკრანებიდან გაქრა. ბორტზე 227 მგზავრი და ეკიპაჟის 12 წევრი იმყოფებოდა. სავარაუდოდ, თვითმფრინავმა კატასტროფა ინდოეთის ოკეანის სამხრეთ ნაწილში განიცადა. საძიებო ოპერაციამ თვითმფრინავის კატასტროფის ადგილის დადგენა ვერ შეძლო.