საფრანგეთის პროკურატურა iPhone-ის შეზღუდული მუშაობის გამო Apple-ს საქმიანობას იძიებს

საფრანგეთის პროკურატურამ  კომპანია Apple-ის წინააღმდეგ გამოძიება მას შემდეგ დაიწყო, რაც გავრცელდა ინფორმაცია იმის შესახებ, რომ კორპორაცია ზოგიერთი თავისი მოდელის მოწყობილობის პროდუქტიულობას განზრახ ამცირებს.

როგორც Associated Press-ი აღნიშნავს, გამოძიებას ის განყოფილება აწარმოებს, რომელიც თაღლითობის საქმეებით არის დაკავებული.

დეკემბერში ფრანგულმა ორგანიზაციამ, რომელიც მომხმარებლების უფლებებს იცავს, ოფიციალური საჩივარი შეიტანა და მოითხოვა შეწყდეს იმ მოწყობილობების პროდუქტიულობის განზრახ შეზღუდვა, რომლებსაც კორპორაცია მოძველებულს უწოდებს.

ფრანგული კანონებით, პროდუქციის გამოყენების ვადების განზრახ შემცირება, რაც მომხმარებლის მიერ ახალი პროდუქტის შეძენის იძულების მიზნით კეთდება, დანაშაულად მიიჩნევა.

Apple-მა მანამდე ბოდიში მოიხადა იმის გამო, რომ iPhone-ის ზოგიერთი მოდელის პროდუქტიულობას ამცირებს და განაცხადა, რომ ეს მოწყობილობების გამორთვის თავიდან აცილების მიზნით კეთდება.

კორპორაციის წინააღმდეგ მსგავსი სარჩელები მანამდე აშშ-სა და ისრაელშიც აღიძრა.