გიორგი კვირიკაშვილს აქვს მაღალი ნდობა ჩვენი გუნდის მხრიდან - ეკა ბესელია

გიორგი კვირიკაშვილს აქვს მაღალი ნდობა ჩვენი გუნდის მხრიდან, ამის შესახებ ეკა ბესელიამ ჟურნალისტებს განუცხადა.

იურიდიული კომიტეტის თავმჯდომარე მმართველ გუნდში შიდა განხეთქილების თაობაზე გავრცელებულ ინფორმაციას არ ადასტურებს.

ამასთან, ეკა ბესელია კატეგორიულად გამორიცხავს პრემიერ-მინისტრის თანამდებობიდან შესაძლო გადადგომის საკითხს.

„პრემიერ-მინისტრს გიორგი კვირიკაშვილს აქვს მაღალი ნდობა ჩვენი გუნდის მხრიდან. მის მიერ მიღებულ გადაწყვეტილებას მთავრობის ცვლილებასთან, სტრუქტურულ ცვლილებებთან დაკავშირებით, საკანონმდებლო დონეზე მან მიიღო სრული მხარდაჭერა. ბევრად უფრო ადრე, რამდენიმე თვის წინ იყო პირველი განცხადებები, რომ ფრაქციები შეიძლება კიდევ შეიქმნას. წლის ბოლოა და ამ პერიოდში ძალიან რთული დინამიური პროცესი იყო პარლამენტში და ორიენტირი გაკეთდა, რომ წლის ბოლოსთვის მოხდეს ასეთი ორგანიზაციული, შიდა სტრუქტურული ცვლილებები,“ - განაცხადა ეკა ბესელიამ.