ერთი პარტიის მიერ ძალაუფლების კონსოლიდაცია ძლიერი და პლურალისტური დემოკრატიის განვითარების შანსებს რისკის ქვეშ აყენებს - NDI

ერთი პარტიის მიერ ძალაუფლების კონსოლიდაცია ძლიერი და პლურალისტური დემოკრატიის განვითარების შანსებს რისკის ქვეშ აყენებს, - ამის შესახებ ნათქვამია NDI-ის სადამკვირვებლო მისიის ანგარიშში. ორგანიზაციაში აცხადებენ, რომ სახელმწიფოს მართვის ყველა დონეზე ერთპარტიული მმართველობა გამყარდა.

,,შექმნილ ვითარებაში ინკლუზიური მმართველობისა და დემოკრატიული კონტროლის მექანიზმების შექმნის პასუხისმგებლობა ხელისუფლებას ეკისრება",- აცხადებს NDI. 

NDI-ის შეფასებით, არჩევნების დღემ, ძირითადად ინციდენტების გარეშე ჩაიარა - საქართველოს მოქალაქეებმა, საარჩევნო კომისიების წევრებმა, პარტიების აქტივისტებმა და კანდიდატებმა მშვიდი განწყობით შეძლეს დემოკრატიული პრინციპებისადმი ერთგულების დამტკიცება. ხმების დათვლის პროცესმაც, NDI-ის აზრით, ძირითადად მშვიდ გარემოში ჩაიარა, თუმცა დამკვირვებლებმა პროცედურების სერიოზული დარღვევის შემთხვევებიც დააფიქსირეს, რაც კომისიის წევრების მხრიდან პროცედურების არასათანადო ცოდნასა და პარტიებთან აფილირებული დამკვირვებლების დათვლის პროცესში ჩარევას უკავშირდებოდა.