ინდონეზიაში აშენდება საპყრობილე, რომელსაც ადამიანების ნაცვლად მშიერი ნიანგები დაიცავენ

ინდონეზიის ხელისუფლება კუნძულზე ციხის აშენებას აპირებს, რომელსაც მშიერი ნიანგები დაიცავენ. საპყრობილეს ბინადრები მხოლოდ ნარკომოვაჭრეები იქნებიან. ამის შესახებ The Digital Journal-ი წერს.

ინდონეზიის ანტინარკოტიკული სააგენტოს ხელმძღვანელის ბუდი ვასეზოს თქმით, ნიანგები უფრო საიმედო მცველები იქნებიან, ვიდრე ადამიანები, რადგან მათ ვერ მოისყიდიან.

ამის გარდა, მისი თქმით, თუ რომელიმე მსჯავრდებული წარუმატებელი გაქცევის შემდეგ რეპტილიის ხახაში აღმოჩნდება, ნიანგს სასტიკი მოპყრობისთვის ბრალს ვერ წარუდგენენ.

აღნიშნული გეგმა იუსტიციის სამინისტროს უკვე გაეგზავნა.

მკაცრი კანონების მიუხედავად, ინდონეზიის საპყრობილეებში ნარკოტიკები ფართოდ არის გავრცელებული. ნარკოტიკებით ვაჭრობასა და მოხმარებას არამხოლოდ პატიმრები, ციხის მცველებიც რეგულარულად მიმართავენ.

ინდონეზიაში მოსახლეობის 2 პროცენტს ნარკომომხმარებლები შეადგენენ.