ლეგალურად ვიმყოფები უკრაინის ტერიტორიაზე - სააკაშვილი

მიხეილ სააკაშვილი ლვოვში, სასტუმრო „ლეოპოლის“ წინ, ჟურნალისტების თანდასწრებით საზღვრის არაკანონიერად გადაკვეთის შესახებ ადმინისტრატიულ პროტოკოლს გაეცნო და მას ხელი მოაწერა.

მიხეილ სააკაშვილმა განაცხადა, რომ მისთვის პროტოკოლი საზღვრის გადაკვეთიდან სამი საათის განმავლობაში უნდა გადაეცათ.

„ყველაფერი მარტივია. საზღვრის გადაკვეთიდან სამი საათის განმავლობაში უნდა გადმოეცათ პროტოკოლი. ვერ იტყვიან, რომ სადღაც ვიმალებოდი. ლვოვის მთავარ მოედანზე ვიყავი ათასობით ლვოველთან ერთად. მაგრამ რასაც ახლა აკეთებენ კანონის დარღვევაა“, - განაცხადა სააკაშვილმა და  დასძინა, რომ უკრაინის ტერიტორიაზე ასოლუტურად ლეგალურად იმყოფება, რადგან უკვე შეიტანა განაცხადი საიმიგრაციო სამსახურში.

მისივე თქმით, გააგრძელებს ბრძოლას უკრაინელ ხალხთან, თუმცა  არ სურს უკრაინის პრეზიდენტობა, არამედ ოლიგარქიული სისტემის შეცვლა.