რუსეთი ნატოსთვის საფრთხეს წარმოადგენს - მაიკ პენსი

აშშ-ის ვიცე-პრეზიდენტმა მაიკ პენსმა, რომელიც ტალინში ორდღიანი ვიზიტთ იმყოფება, განაცხადა, რომ რუსეთი ნატოს ქვეყნებისთვის საფრთხეს წარმოადგენს და აშშ ყველაფერს აკეთებს იმისათვის, რომ ის შეაჩეროს.

„რუსეთი ნატოს ქვეყნებისთვის საფრთხეს წარმოადგენს და აშშ ყველაფერს აკეთებს იმისათვის, რომ ის შეაჩეროს. ჩვენ მტკიცედ ვიცავთ მეხუთე მუხლს (ნატოს წესდების), რომლის შესაბამისადაც ნატოს ერთ-ერთ წევრზე თავდასხმა წარმოადგენს ყველა წევრზე თავდასხმას“, - განაცხადა პენსმა ტალინში ესტონეთის, ლატვიისა და ლიტვის მეთაურებთან ერთად გამართულ პრესკონფერენციაზე.
ვიცე-პრეზიდენტს დღეს უკვე თბილისში ელოდებიან.

საქართველოს პრემიერ-მინისტრ გიორგი კვირიკაშვილის მოწვევით, 31 ივლისსა და 1-ელ აგვისტოს, საქართველოს ის მეუღლესთან ერთად ეწვევა. 

დღეს, 19:00 საათზე, თბილისის საერთაშორისო აეროპორტში, აშშ-ის ვიცე-პრეზიდენტის დახვედრის ოფიციალური ცერემონია გაიმართება (მედიის წარმომადგენლების აეროპორტში მისვლის დრო 16:00 საათიდან). 

აშშ-ის ვიცე-პრეზიდენტს, მეუღლესა და დელეგაციასთან ერთად, საქართველოს პრემიერ-მინისტრი ოფიციალურ ვახშამზე უმასპინძლებს. 

1-ელ აგვისტოს, 10:15 საათზე, საქართველოს მთავრობის ადმინისტრაციაში გაიმართება პრემიერ-მინისტრისა და აშშ-ის ვიცე-პრეზიდენტის შეხვედრა, რის შემდეგაც, 11:15 საათზე, პრესისთვის ერთობლივი განცხადებები გაკეთდება.

15:15 საათზე, აშშ-ის ვიცე-პრეზიდენტი სწავლება „ღირსეული პარტნიორის" მონაწილე სამხედროებს შეხვდება. 

მაიკ პენსის ვიზიტი საქართველოში 1-ელ აგვისტოს დასრულდება. აშშ-ის ვიცე-პრეზიდენტი თბილისს 16:00 საათზე დატოვებს.