Facebook-ის მოგება 75%-ით გაიზარდა და 3 მილიარდი დოლარი შეადგინა

Facebook-ზე უკვე 2 მილიარდამდე ადამიანია რეგისტრირებული, - ამის შესახებ ინფორმაციას The Telegraph ავრცელებს. გამოცემის ცნობით, სოციალური ქსელის მომხმარებელთა რაოდენობის ზრდის პარალელურად კომპანიის ყოველთვიური მოგებაც გაიზარდა და ის მილიარდ დოლარამდეა.

"2017 წლის პირველ ნახევარში, Facebook-ის მოგება, რომელიც კომპანიას სოციალურ ქსელში განთავსებული რეკლამებიდან აქვს, 75%-ით გაიზარდა და 3 მილიარდი დოლარი შეადგინა.

Facebook-ზე ყოველთვიურად სოციალური ქსელის მომხმარებელთა საშუალო რიცხვი 80 მილიონიდან 1,94 მილიარდამდე გაიზარდა, ანუ მსოფლიო მოსახლეობის მეოთხედი Facebook-ს იყენებს. რაც შეეხება ყოველდღიურ მომხმარებლებს, მათი რაოდენობა 1.3 მილიარდი ადამიანია", - წერს The Telegraph.

გამოცემის ცნობით, ბოლო პერიოდში, Facebook live-ის მეშვეობით განხორციელებულმა მკვლელობებმა, ქსელში გამოქვეყნებულმა არალეგალურმა და აგრესიულმა ინფორმაციამ, კომპანიის იმიჯი შელახა და არა ერთ სკანდალში გახვია. მიუხედავად ამისა, Facebook-ის მოგება მუდმივად იზრდება.

შეგახსენებთ, რომ Facebook-ი 13 წლის წინ მარკ ცუკერბერგმა ჰარვარდში, საკუთარ საცხოვრებელ ოთახში შექმნა.